|
|
A Tirin
Kan thurin bu Bible-a inziak hmasa ber chu “A tirin Pathianin lei leh van a siam a,” tih a ni. Thil hmasa ber hi a pawimawh ber ni zel dawn se chuan Pathianin lei leh van a siam thu hi Bible chhûnga thu pawimawh ber tihna a ni ang. Kan sawi thiam dan azir leh kan hmui themthiam dan azirin a nih pawh a ni maithei reng a ni. He Bible châng kan chhiar phat hian Pathian ropuizia, engkim tithei, engkim chunga roreltu a nihzia kan hmu nghal a. Chutiang taka engkim tithei, engkim siamtu, engkim chunga roreltu ni bawk chu Pathian ni tlâk, Pathian niawm reng leh biak tlâk Pathian ngei a ni tihna a ni bawk.
He thu, Mizo Bible-a thumal hmasa ber ‘a tir’ tih hi eng tianga rei tawh nge a nih tih hi hriat châkawm tak a ni. Scientist tam tak chuan lei leh vante khi kum tluklehdingawn 13 atanga 15 inkâr vela upa niin an hria a. Kan chenna khawvel bik hi kum tluklehdingawn li leh a chanve vel niin an hre bawk a. Chu chu a dik leh dik loh fiah theih rual a ni lo. Pathian erawh chuan, “Kei Alpha leh Omega, a Hmasaber leh a Hnuhnungber, a Bul leh a Tâwp ka ni,” a ti (Thupuan 22:13). Chu pawh chu mihring finna leh ngaihtuahna hian eng chen nge ni tawh ang a ngaihruat thiam lo a ni ber.
Pathian thu lam atanga ‘a tir’ chhuitu lar ber chu Ireland ram pum puia kohhran hotu Anglican Archbishop, James Ussher-a (1581-1656) kha a ni. Ani chhût dan chuan Pathianin khawvel a siam kum kha BC 4004 a ni a. Hei hi Bible-a inthlahchhawn dân inziak hmanga a chhût a ni. A thianpa Bishop Lightfoot-a (1602-1675) phei chuan a han chhût chipchiar khawp a; BC 4004 October 23, zing lam dâr 9:00 chiah (45th Meridian Time) niin a sawi. Juda mithiamte chuan BC 3761 October 7 niin an chhût chhuak bawk. Bible-a mihring inthlah chhawn dânah hian mi thiamte chuan Juda-te khân hmaih an nei zauh zauhin an hria a, chuvangin an chhût dan hi a inang thei lo a ni.
Engpawhnise hengte hi a awihawm tih avanga sawi kan ni lo tih kha hre reng ila. Tuman kan hre tak tak lo tihna a ni mah zâwk.
Science lam atanga ‘a tir’ tih ngaihdan lar ber leh sawi hlawh ber chu Big Bang Theory hi a ni. He ngaihdan pawmtute chuan universe lo intanna chu Planck epoch (or Planck era-Max Planck-a hming chawia phuah) a ni a. Chu chu hun lo intanna pawh a ni. Chutih hun lai chuan kan chenna khawvel leh arsi kan hmuh phâk universe-a thil awm zawng zawng leh thahrui zawng zawng hi hmun khatah an awm khawm vek a, (a tawi zawngin) chu chu a ruh em em a, a sa bawk a. A hmingah cosmic egg an vuah a. Mahse chu cosmic egg chu engtia lo awm nge a nih a, eng tianga lo awm thei mai nge a nih chu tuman an sawi chiang thei lo. Chu cosmic egg chu energy inhlawm khawm a ni ber e. Chu thil muk lutuk leh thahrui hlâwm chu kum tluklehdingawn 13.7 vel kal ta khan a puak ta dur mai a. Tichuan chu thil puak darh lêng ta chum chum mai chu tuna lei leh van universe kan tih hi a lo ni ta mai a ni an ti a. Hei hi scientist-ten ‘a tir’ tia an sawi dan chu a ni.
Kan naupan lâi chuan Pathian chu khawvel a siam hma lawka lo piang chawp niin kan hre thin. Vawikhat pawh kan thianhovin kan sawi khawm a. Pathian chuan a taksa dang siam nân a bân a siam hmasa ber a, chumi hnu-ah a taksa dang chu a siam chauh a ni tiin kan sawi khâwm ve laih laih a. Chu chu naupang kum nga mi vel kan nih lâia ‘a tir’ kan ngaihruat thiam ve dân tâwk chu a ni. Mahse Pathian chu chatuan mi, chatuan atanga lo awm tawh, bul leh tâwp nei lo a ni a. Chuvangin universe, lei leh van zawng zawngte khi tunhma kum 6,000 emaw vel leka insiam chu ni theiin a lang lo. Kei chuan chutiang leka upa ni tura ka dah chhin hian ka ui a. Pathian ropuizia leh chatuan mi a nihzia nen pawh inkalh deuh zawk hialin ka hre thin. Mahse chu chu keima ui thu mai a ni e.
Bible sawi danin a tir chuan khawvel hi a thim mup a, tuiin a chim reng bawk a. Chutiang dinhmunah chuan engtianga rei nge a lo awm pawh hriat rual a ni lo. Amarawhchu khawvel hi nunna nei rannung, thing leh mâu leh mihring chenna tur atan renga buatsaih a nihna chu nunna neiin an mamawh hmasak ber tuiin a lo chim reng hi a ni.
Pathian chuan he khawvelah hian nunna a siam dawn avangin nunna atana mamawh hmasa ber tui chu a lo dah lâwk ni te pawhin a lang bawk. Tui hi hydrogen atom pahnih leh oxygen atom pakhat inbelhbawmin a siam a ni a, mak tak a ni ringawt. Thil alh duh em em mai pahnih infin chuan thil alh thei miah lo, thil alh haw em em, khawvela kangthelhna tha ber zu siam tlata mawle! Tin, a inbelhbawm tawh lah hi phelh a harsa em em lehnghal. Tunah hian scientist-te chuan tui molecule phelh darh dan chu an thiam tawh a. Mahse a la hautak deuh hlek avangin chutia mahni hman hun huna phelh darh mai theih chu a la ni lo deuh.
Mihring taksa za zela 70 hi tui a ni a. Kan thisen za zela 80 hi tui a ni leh a, kan tihrawl za zela 75 hi tui a nih bâkah kan ruh ngei pawh hi za zela 50 chu tui tho a ni. Kan thluakah hian cell tluklehdingawn 15 atanga 40 inkâr a awm a, kan thluaka cell te chu za zela 80 tui bawk a ni. Tui dahna ip kal thei kan ni ber e. Heti taka kan taksa hian tui chu a pai hnem avangin tui hi kan mamawh tam hle a. Ni tin no riat tal kan mamawh ang a ni.
Mihring taksa-ah chauh hian tui hi a tam lo. Vaimim fang hi za zela 70 chu tui a ni a. Alu pakhata tui awm zât chu za zela 80 a ni. Tomato leh fanghma pumkhata tui awm zat chu za zela 95 lai a ni bawk.
Tui hian kan chaw eia chakna awm chu a lo tisawm a, kan taksa hmun hrang hrangah a phur kual thin. Kan chaw ei chu thahruiah a lo siam a. Chutah kan taksain a mamawh tawh lohho chu phur sawn lehin taksa pâwn lamah a paih chhuak thin a ni. Chaw tel lo chuan thla khat lai pawh a dam theih a, tui tel loh erawh chuan chawlhkâr khat emaw chauh kan dam thei (kan awmna hmuna zirin). Mak tak mai chu kan taksa za zela 70 hi tui a ni a. Chutiang tak chuan bucket-ah lei nawi no 30 leh tui no 70 dah pawlh ila, a tui pur ringawt ang a, thil engemaw hmêlhmang nei siam nan a hman theih hauh loh ang. Mahse Pathian chuan hetiang proportion chiah chiah hmang hian mihring te leh thlai te hi a siam thei si a ni.
Tuifinriat tui chu a al tih kan hria a. Pathianin khawvel a chei that hmaa lei tuamtu tui hi a al ve em? Hei hi zawhna awm tak pawh a ni. Tuifinriatah hian khawmual atangin lui a luang lut reng a. Chung luite chuan an pal tlang leilunga chi awm chu Tuifinriatah chuan an phur lût zel a. Tichuan Tuifinriata tui chu niin a em lum a, tuihu-ah a lo chang a. Tuia chi awm chu tuihu-ah a chan ve theih loh avangin chi chu a lo tam hret hret a, Tuifinriat chu a lo al ta mai a ni.
Hei hi chhanna tha tak niin a lang a, mahse a dik si lo. Dik se chuan Tuifinriat khu a kum telin a al tial tial tur a ni. Mahse scientist-ten an test tirh atangin Tuifinriat tui khu a al ngaiin a la al reng a. Chu bâkah khawmuala chi awm zawng zawng aiin Tuifinriata chi awm khu a tam zâwk daih a ni. Tuifinriat tui mêl khat bial (cubic) zelah chi ton maktaduaih 166 zel awm anga chhût a ni a. Chu chu khawmualah la chhuak ila chi tlang fit 500-a chhahin khawmual hi a tuam chhuak vek thei ang. Chung chi za zela 85 chu sodium chloride – kan chi liah thin pangngai ang hi a ni nghe nghe a. Chung zozai chi chu khawi atanga lo kal nge?
Rin dan mai lo chu sawi theih a ni lo. Scientist thenkhat rin dan chuan hman lai, Tuan leh mang kal tawhah khan khawvelah hian tlangkâng nasa deuh mai a lo awm tawh a. Chu tlangkang râpthlak tak mai chuan leilung pawn lânga chemical awm dan hi a tidanglam a nih an ring a. Hei hi Bible lam atang pawhin ‘a dik awm mang e’ an ti bawk. Sodom leh Gomora chanchin kan chhiar chuan Pathianin an sual avangin a hrem a. Hrem pumpelh tuma tlanchhuak ve Lota nupui chu kawng lakah chilungah a chang tih kan hria a. Helai ruam, Sodom leh Gomora awmna ruam hi Bible chuan “Chi ruam” (Valley of Salt) a ti a (Deut. 29:23; 2 Samuela 8:13). He ruam hi tuna Tuipui Thi, khawvela tui al ber awmna hmun khu a ni. Kum 4,000 kal ta pawh khan ‘Tuifinriat Al’ tia hriat a lo ni tawh reng reng bawk (Genesis 14:3). Scientist-ho sawi danin Tuipui Thi khu tun hma atangin a al dan ngai rengin a la al a nih chu. Tuipui Thi leh a chhehvel ram en khuan tunhmain tlângkang nasa tak a lo tuar tawh thin tih hai rual a ni lo.
Tuilêt lâi khan nasa takin tlâng a kang tel niin a lang a (Genesis 7:11). Kha thil thleng râpthlak tak kha Tuifinriat tui lo al chhan niin mi tam tak chuan an ngâi awm e. Mahse heng hi theory mai a ni tih hriat a tha. Thil thleng tak tak, hnial rual loh thudik anga sawi pawr chiam chi a ni awm lo ve. Mahse thil mak deuh a awm, Tuifinriat tui al dan hi a chhûnga rannung leh hnim awmho tân a tâwk chiah zu nia.
Tin, thil dang reng reng hi chu a vawhin a sâwng tê thin a. Tui danglamna leh Pathian themthiamzia lanna chu a khang (vûra a chan) veleha a zâng zawk tlat leh a lian ta sawt hi a ni. Vûr hi tui pangngai âia a zân zâwk avangin tuiah a lâng thei a. A inhlawm khawm khân rit zâwk se chuan tui chhûngah a pil ang a, chu chuan tui chhung lam kha tivawtin sangha leh rannung dang reng reng chuan an thih phah nasa hle ang. Mahse mak tak maiin vûr chu tui aia a zân zâwk miau avangin a lâng ta a. Tuifinriat leh lui tuite vûrin chhah deuh maiin an bawh khah tlat hian pawn lam boruak vâwt lakah tui kha a him hlauh a, chu chuan tui chhunga rannung awmte kha a vêng ta zâwk a ni. Pathian themthiamzia hi a mak hle lo maw? Hetiang hi tihpalh thila lo thleng niin kan ring em?
Lei pâwn lâng hmun lia thena hmun thum zet hi tui a ni kan tih tawh kha. Hei hian tuifinriat chhung zau turzia leh ropui turzia min ngaihtuahtir theiin ka ring. Tuifinriat mawngah khuan phâizawl zâu pui pui, khawmual phâizâwl lêt engemaw zâta zâu te, khâm khawkrawk tak tak leh lungpui lian pui pui te, pûk thûk tak tak te, tlâng sâng tak tak te a awm a. Tlângdung sei pui pui, khawmual tlângdung sei ber Andes tlângdung lêt engemaw zâta sei te pawh a awm bawk. Chung tuifinriat hnuai tlângdung zingah chuan Atlantic tuipui lailia tlângdung, chhim leh hmar zâwnga inkhawh Mid-Atlantic Ridge (MAR) khu a sei ber awm e. Hmar tâwp lam Greenland atanga chhim lam zawnga inkhawh pheiin South Africa piah hla fê-ah Indian Ocean hnuaia tlângdung ve bawk nen a inpawh a. A sei zawng hi kilometer 40,000 zet a ni. He tlângdung hi tuifianriat thûk taka awm mah ni se Iceland thliarkar velah chuan tuipui chung lamah a rawn lawr pha a ni.
Khawvel inrelbawl dan chi hrang hrang en hian Pathian ropuizia leh themthiamzia a lang chiang em em a. Sawi sên a ni lo. Chuvangin a tira Pathianin khawvel a siam dan indawt chho hmang hian titi kan han vâwr dâwn a ni. Ka duh duh ka hawl kual ve dawn a ni a, a ngaihnawm meuh ang emaw chu. Lehkha ziah hian mi endik tur ni miah lova zalen taka mahni duhlam hawi hawi ziah hi nuam berin ka hria.
1. “Eng Lo Awm Rawh Se” A Ni Khatna Chu
Khawvel chu a chhia a, a ruak a, a thim mup mai a. Hmêl mumal pawh a pu lo niawm tak a ni. Chu khawvel thim mup mai chu Pathian ropuina chuan a han tiêng ta phût mai a. Hmu ve thei ila a hmuhnawm ngawtin a rinawm.
Pathianin khawvel a siam thu kan sawi hian tuman ‘a ni khatna-ah’ tui a siam thu kan sawi tel ngai lo. ‘A ni khatna-ah êng a siam’ kan ti vek. Tui chu thil lo awm sa, eng tik lai atanga lo awm tawh nge a nih tuma hriat loh leh an sawi ngai loh a ni. Tui chung chu a thim mup a, Pathian Thlarauvin a awp tih kan hria. Eng chen nge chutiang chuan tui chung thim mup mai chu a lo awm tawh hriat phâk a ni lo va, keini ang duang chuan hriat tum chi a ni hek lo. Bible pawh a ngâwi tlat. A ni khatnaa êng a siam thu a sawi ringawt mai a ni.
Eng (light) hi amaha lo awm ngawt thei a ni em? Ni tin khaw êng hmu thei mit tha pangngai nei chuan ngaiah kan nei a, kan ngaihtuah zui lutuk vak lo. Mahse êng hi zir tham a awm a, chanchin pawh a nei ngaihnawm khawp mai.
Eng hi hmuh theih leh hmuh theih loh a awm a. Amarawhchu a eng ngau ngau hi chu hmuh theih pakhatmah a awm lo thung. Engin thil engemaw a va chhun a, chumi lo sawhkhawk leh atang chuan eng nge a va chhun kha kan hmu thei ta a. Chu chu êng kan tih tak, hmu theia kan inhriat tâk bera chu a ni. Eng ni ve si, chutianga hmuh theih loh chu a awm nual a, chungte chu cosmic ray te, x-ray te, ultraviolet ray te, gamma ray etc., te an ni.
Eng zung kan tih ray of light hi photon hlawm fâwn vel ti ila a Mizo tawngin a hriat a awlsam ber awm e. Heng photon te hi anmahni ringawtin a lo awm thei lo; tlâng sâng luiten hnâr an nei ang hian lo chhuahna hnâr a nei ngei thin a. Chungte chu Ni te, mei alh te, electric te, van sâng hla taka arsi etc., te an ni. Photon te chu chakna thahrui te reuh tê tê (particles of energy) hlawm fâwn vel a ni a. An têt em avangin mit lawnga han hmuh mai mai rual a ni lo. Tuifâwn angin a fâwn a. Mahse a fâwn wave hi a tawi em avangin teh mai mai theih a ni lo. Scientist-te erawh chuan a tehna an nei a, chu chu angstrom an ti. Angstrom maktaduaih 250 chu insi thapin rem tlar ila inchi khat vel bâkin a sei lo vang.
Heti taka wave length tâwi hi scientist-te chuan thil dang teh nân an la hmang thei cheu nia! Atom len zawng teh nân leh sahbawn phuan pan tak mai chhah zâwng teh nân an hmang a ni. Mihringin kan hmuh theih chin chu angstrom 4000, rawng dumpâwl tak deuh leh angstrom 7000, rawng senduk inkâr hi a ni ber.
Tin, êng hi a kal chak hle a, Albert Einstein-a phei chuan êng aia chakin thil dang engmah a kal thei lo a ti. Boruak awm lohna hmunah chuan second khat chhungin meter 299,792,458 a kal thei a. Chu chu second khata mêl 186,282 a ni. Boruak awm lohna hmuna êng kal chak zawng hi a symbol chuan c an ti a, constant tihna emaw Latin tawnga celeritas tihna emaw a ni. Thil langtlang thei, entirnân boruak emaw darthlalang emawa a kal chak theih zawng (speed) chu v a ni a. Boruak awm lohnaa a kal chak theih lam nena khaikhinna ratio chu refractive index (n=c/v) an ti leh a. Chutiang anga chhût chuan boruak awm lohna aiin dârthlalangah chuan second khat zelah kilometer sawmkuain a kal tawi zâwk a ni.
2. Tuifinriat, Khawmual leh Van Boruak:
A Ni Hnihna Chu
Pathianin mihring chen nâna khawvel a buatsaih dan hi a ropui a, a ngaihnawm a, a mak a, a ril em em bawk. Chu chu tuifinriat, khawmual leh van boruak a inrem fel dan atang hian a hmuh theih a ni.
Khawvel hmun lia thena hmun thum hi tuiin a chim a. Tuifinriat zâu pui pui mai kâra khawmual lo langte hi tuifinriat zauzia ngaihtuah chuan an zim hle. Khawmualpui kan tihte meuh pawh hi tuifinriat zauzia ngaihtuah chuan thliarkar ang lek a ni. Hei hi a tira Pathian remruat dan a ni chiah em tih erawh chu kan hre lo. Tuilêt hnu hian khawvel hi a chhe hle niin sawi a ni a. Mahse tuman Tuilêt hma kha an hmu bik lo va, rinthu a ni e.
Kan awmna lei hi Pathian chuan boruakin a tuam chhuak vek a. A chhah lam hi kilometer 11 zet a ni a. Amarawhchu boruak han thlen san chin tak tak hi a ramri kham hleih theih a ni lo. Rocket an kah chhuah rawn lêt lehte chuan lei tuamtu boruak hi kilometer 120 vel atangin an hre tan niin an sawi a. Karman Line an tih, kilometer za vela sâng khi lei tuamtu boruak ramria ngaih deuh chu a ni. Chu pawh chu ngaihruatna a ni ber.
Kan lei tuamtu boruak hi a tam ber nitrogen niin boruak za zela 78.09 a ni a. Za zela 20.95 hi oxygen a ni. A dangte chu argon za zelah 0.93, carbon dioxide 0.039 leh a dangte an ni. Hetah hian Pathian themthiamzia a lo lang. Oxygen tel lovin kan nung thei lo va, mahse oxygen hi thil alh duh tak mai a ni a, a hlang chuan hip lût ila kan alh pup pup thei dawn niin an sawi. Nitrogen nen hian mihring ngeih tâwk chauhin a inpawlh a, chuti ni lo se a lova kan awm theih loh boruak chu kan thihpui tur thil a ni.
Kan lei tuamtu boruak chanchin ringawt atang pawh hian ‘I kutchhuak thilsiam tinreng,’ tia Pathian fak hi kan ba hlein a lang. Tin, chu boruak chuan kan lei hi a tuam satliah a ni lo va, lum lutuk tur lak atang te, vawt lutuk tur lakah ten min vêng him a. Chu mai a la ni lo cheu, Ni atanga êng zung hlauhawm tak tak rawn lût tur lak ata min vên bâkah lei piah lam ram atanga van lungthil lian pui pui thlâwk fur fur thin lak ata min vênghim bawk. Boruak hi awm ta lo se chu a khât tâwkin van thengrenga lungpui lian pui pui thlâwk vel chuan min rawn su fo ang a, nuam kan sa hauh lo vang.
Tin, boruak hi awm ta lo se chuan Ni tlâk veleh khua hi aimit thlawn ang maiin a thim nghal bur ang a, a vawt nghal ngawih ngawih bawk ang. Zing vartian pawh a awm lo vang; Ni chhuah veleh a êng nghal uarh ang a, ni sat vanglai ang maiin a sa nghal tlawk tlawk bawk ang. Tin, ri reng reng hriat tur a awm lo vang a, zaithiam leh thiam lo kan thuhmun reng dawn a ni.
Tuifinriat Tunhnai Thu Thar
Kum 2012 June 19 khân Swedish tuichhûng lût thiam, Oceon-X team member-te chuan indopui pakhatna hun laia thlawhna tla an zawnna lamah Baltic tuipui mawngah sâwn thilmak lutuk mai an hmuchhuak ta tlat mai le.
He an thil hmuhchhuah hi Baltic Anomaly an ti a. Anomaly chu thil a nih dan tur pangngai anga awm lo sawina a ni. Chu an thil hmuhchhuah chu an en chian poh leh mak an ti a, sawifiah ngaihna pawh an la hre lo. Sweden leh Finland inkâr tuipui hnuai feet 275-a thûkah chuan thlawhna tumkawng ang mai hian meter 1,500 zet tur hi a inphah zui mai a. Chu tumkawng (tiphawt ila) tâwpah chuan meter 60 zeta chhah hian leilung chu a toh lâwt a, chumi thil toh lâwt chungah chuan lungphêk (lung a nih chiah leh chiah loh pawh hriat a la ni lo va) lian em em mai hi a awm a. Chu lung chungah chuan ngil nalh tak tak hian thil a inziak tlat mai a nih chu.
Tin, he lung tungsawl chunga thil inrin bâkah hian a chung zâwl pan chhohna step niawm tak leh bang niawm tak an hmu a. Tin, a chhûng lam pan chhukna step niawm takte pawh a awm bawk. Chu mai chu a la ni lo cheu, he thilmak deuh mai atanga meter zahnih velah hian Gothic biak in tukverh ang deuh mai hi thil dang a awm bawk a. Chu thil hual vel chuan mihringin an remkhawm niawm tak hian lung 25-30 bâwr vel hi a inrem kual lehzel bawk a. Chu pawh chu finfiah châkawm tak a la ni.
He Baltic Anomaly hi fiah tura a bul hnaia kal a harsa hle niin an sawi bawk. Hei hi a chhan chu a bul meter zahnih bial velah chuan electronic lam thil reng rengin hna a thawk thei lo va, a thi hmiah zel an ti. Thil engemaw tak hian a lo dal tlat mai niin an sawi bawk.
He tuipui chhûnga an thil hmuh hian mak tih a hlawh hle a, thu lêng vâk pawh a tam phah khawp mai. Mi thenkhat chuan Nazi hun lâia indona hmanrua atana an siam a nih an ring a. Thlengthlâwkthei sulhnu a nih ring an awm a, Russia thiam thil nia ringte pawh an awm.
Tuifinriat khu a thûk si, a zâu si, a thim bawk si, a awm dan chiah pawh hi hriat hleih theih a ni lo. Thla-ah khian mi 12 an han tum tawh a, tuifinriat thûk lâi ber Mariana Trench-ah (6,811 feet /2,076 meters) chuan kum 1960-a U.S. Navy Lieutenant Don Walsh leh Jacques Piccard ten an thlen bâk kha tumah an la thleng thla leh lo. Tuifinriat mawng âiin mihringte hian thla leilung leh planet pakhat Mars khi kan hre chiang zâwk a, kan bel chiang zâwk a, sawi tur pawh kan ngah zâwk. Tin, khawvel pâwn lam arsi chanchin zir turin pawisa pawh a lêt engemaw zâtin kan sêng tam zâwk bawk. Tuifinriat tui chhûng lam za zela 99 chu la hriat chian loh a ni.
Tuifinriat hlauhna hian hmanlai phei chuan mihring rilru-ah hmun a luah thûk hle a ni. Tuifinriat chu a zâu va, a thûk bawk si nên hmun hlauhawm zual leh chanchin ngaihnawm tak tak pawh a tam khawp mai. Chung zinga a hlauhawm zual leh mi hriat hlawh deuh deuhte chu han chul ram fan thuak thuak ila.
Tuifinriata hmun hlauhawm ber pakhat chu Burmuda Triangle khu a ni. He triangle hi kilometer maktaduaih khat bial vela zâu, North America leh South America inkâr chhak lam tuipui zâu tak luahtu khua a ni. USA chhim chhak lama khawmual inkhawh lût Florida atanga chhim lam Bermuda thlengin a kal phei a, chuta tang chuan hmar chhak lam hawia lo kir lehin Puerto Rico a han thleng chho leh a. Puerto Rico atang chuan hmâr thlang lam hawia kal zelin Florida a zu pawh leh ta a ni.
Kum 1940 chho khân he lâi hmunah hian mak tak takin lawng leh thlawhna an bo thin a. A bikin kum 1945 December 5-a Avenger bomber panga an bo hnu phei kha chuan miin an ngaihven lehzual a. Pilot-te chuan ‘tui vâr’ chhûngah an lût dâwn mêk tih an sawi hman tawk a, an reh ta vang vang mai a ni. Chung thlawhna zawng tur leh chhan chhuak tura an thlawhna tirh chu a bo ve leh ta zel a. Chu chuan mi ngaihven leh ngaihnawm tih a hlawhtir lehzual bawk. Kum 50 chhûngin lawng leh thlawhna sawmnga dâwn lâi a bo hman a. Amarawhchu kum 1980 chho atang khân a reh ta a ni.
Bermuda triangle-a chhiatna thleng thinte hi a chhan an inrinsiak luih luih a. Thlengthlâwkthei lam mite thiltih a nih ring pâwl an awm a. Rin dan chi hrang hrang a tam khawp mai. Sakhuana lama lo la lût te pawh bang bik lo. Tun hnua miin an pawm tlân deuh tâk ber chu Australia rama Monash University a thawk Joseph Monaghan-a theory hi a ni. Kum 2003 khân Joseph-a chuan scientific ang reng tak mai ngaihdan a rawn vawrh chhuak a. A ngaihdan chu American Journal of Physics-ah “Could Methane Bubbles Sink Ships?” tih thupui hmangin a chhuah a. A sawi dan chuan a experiment atangin methane boruakte hian lawng an tipil thei a ni.
Joseph-a chuan tui hnuai thûk taka methane hlâwm, gas hydrate an tihte chu tuipui chung lamah an rawn phuan chhuak vak thei a. Hmun hnâwng leh thil laihchhuahna hmuna awm thin rim nei lo boruakte chu tuipui mawngah tuifinriat rihna chuan thil sakhat ni thei hial khawpa ritin a delh thei. Vûr khâwn ang maia methane boruak hlâwm chu tuipui chung lama an lo chhuah chuan nasa takin a phuan bulh bulh thei a. Chu chuan lawng leh thlawhnaa electronic hmanraw hnathawh a tibuai thei a ni. Tin, lawngte pawh tui sakhatna (density) a lo hniam thut khân an pil thei bawk.
Bermuda-a thil thleng pakhat, Flying Dutchman an tihfiam thin chu mak tak maia lawngpûte an bo daih thin kha a ni. Hei hi a chhan awm thei chu infrasound vang niin an ngâi bawk. Scientist thenkhat chuan infrasound hi tui chhûng atanga a pâwn lama boruak lo phuan chhuakin a siam thei a. Chung thil phuan ri chuan mihring lûng leh thisen zâmah hlauhna nasa tak a siam a. Chutiang a lo thlen chuan nasa takin mi chu a lo chi-âi vak a. Lawngpûte awm ngaihna hre lo, an thil tawn pumpelh duh chu tuipuiah an zuang lût a ni thei.
He ngaihdan hi a pawmawm ang reng viau a. Amarawhchu eng vanga kum 1980 hnu lama chutiang chu thleng leh ngai ta miah lo nge an nih tih chu tuman an hrilhfiah thiam tawh lawi si lo.
Sargasso Sea
Sargasso tuipui hi Atlantic Tuipui lailia awm a ni a. Tuipui chhûngah tuipui dang a awm tihna a ni ber e. He tuipui hi sana vir zawng hian a vir mup mup mai a. Tuipui hnim chi khat sargasso an tih chu a tam em em mai a. Chu chu tuifâwn chuan a vir pui bawk. He tuipui vir mup mup mai hian dân hran a nei ve tlat mai a. Chu tuipui temperature chu a pâwn lama amah hual veltu tui aiin a sâng zâwk tlat bawk. Chu mai a la ni lo, mit a vai duh viau nge ni, chumi hmuna awm tam tak chuan Ni khi a ruala khawchhak leh khawthlanga lo chhuak angin an hmu fo mai. He tuifâwn hian chung lam boruakah cyclone a siam fo va, chu cyclone kal zel chuan Bermuda triangle chhûnga thlawhna tênâu deuh thlâwk laite chu a titla a nih an ring.
Devil's Sea
He tuipui hi ramhuai tuipui tih mai awm a ni reng e. Tokyo atanga chhim lam kilometer za vel, Miyake thliarkâr bul vela awm a ni a. Mapah zawn chi a ni lo. Lawng mite chuan he lai hmun hi pumpelh hram an duh thin. Thlipuite hi a rawn thawk thut a, chutah mak tak maiin a bâng leh thut thin. Mak tak a ni. Whale te, dolphin leh sava te pawh he lai hmunah hian an awm duh lo niin an sawi. Kum 1950 chho khân kum nga chhûngin lawng pakua a bo hman a. A lar ber chu Japanese research tihna lawng Kaiyo Maru No.5 kha a ni.
Helai tuipui hnuaiah hian tlângkang a awm a. Tuipui mawng lam chu a che deuh reng niin an hria. Tlângkangin a siam thliarkar te hi a rawn lang thut a, a hnu rei lo tê-ah a bo leh daih thin. Tin, helâi velah hian cyclone na fê fê a tleh fo bawk.
Cape of Good Hope
South Africa tuipui kam chhim lam, Cape of Good Hope an tih saw thenkhat chuan Cape of Storms tiin an ko bawk. Saw tuipuiah sâwn thlipui te a tleh thut thut a. Tui lah chu sâng tak tak, meter sawmthum lâia sângten a fâwn hlup hlup a. A han kaltluan laklawh tawh vêk vêk lah chuan mâr pât hian kilometer tam tak tak a fâwn bawk si a. A hlauhawmzia an hrilhfâk thin. Lawng engzât nge he tuipui hian a lo dawlh tawh pawh hriat phâk a ni lo an ti hial a ni.
Hei lo pawh hi Norway hmâr thlang lam tuipui saw an sawi hlauhawm fê bawk. A hmingah pawh Maelstrom livir an ti a. Livir hrâng tak niin an sawi. Ni khatah nasa fê fêin vawihnih a vir chiam thin a. A livir chak dân chu tuifâwn pangngai lêt sawm zet a ni.
Hei lo pawh hi thawnthu ang deuha an sawi hmun hlauhawm tak tak a la awm a. Amarawhchu a thente hi chu a lasi thawnthu deuh a, sawi lan loh pawh a pawi lo vang chu.
Tuifinriat chhûngah khuan rannung eng zât nge awm hriat sên rual a ni lo. Mithiam tam takin an han rin chhin dan chuan khawvela rannung za zela 90 chu tuifinriat chhûnga awm niin an ngâi hial a. Amarawhchu tuilût mi tam tak chuan fit 1,500 velah khuan nunna nei thil che vel hmuh tur awm mang tawh lovin an hria a. Mahse hei hi thil hmuh chian a harsat vang mai a ni an ti.
Tun hnâiah hian thiamna a lo sâng ta a, tunhma lama an tlawh pawh phâk loh tuifinriat hnuaite pawh an zu hmu pha tan ta. A thim em avang leh tui rihna a nasat tawh lutuk avanga nunna nei thil engmah a awm theih pawha an rin lohna hmunah rannung mak tak tak an hmuchhuak thar a. Chung an hmuh chhuah pakhat chu changpât lianpui, fit riat zeta sei, a ruala awm chi an ni a, eng tin nge mêl hnih mêl thuma thûk tuifinriatah chuan an dam khawchhuah theih hriat a ni lo.
Tuifinriat chhûng hi mihringte hian kan la hre tlêm em em a, thiamna sâng zelin tlêm tlêma a hriat belh hi kan nghâk ngawt mai lo thei ta lo a ni. Tuifinriat chhûnga Pathian themthiamzia inphûm kuh tûn mai khu chiang zâwka hriat chu châkawm tak a ni.
3. Hnim, Thlai leh Thingte: A Ni Thumna
Khawvel chu tuifinriat leh khawmualah a inthen fel ta. Mahse a la ruak huai mai. A ni thum ni chuan Pathianin khawvel chu thing chi hrang hrang nuaih têl bâkah hnim leh thlai chi hrang hrangin a tikhat a. Heng khawvel tuamtu hnim leh thingte hi ruahmanna fel tak leh fing tak hnuaia lo piang an ni tih chu an awm dan en hian hnial rual a ni lo (keinin mawlmang taka ‘hnial rual a ni lo,’ kan han tih ve phawng phawng ang hi mithiamte chuan hnialna an lo nei tha leh fê thin).
Sâpho pek chuan thing (tree) kan tih chin chu a kung, âwm chen vela teha cm 10 hawlhtlang chin hi an tideuh bik a. A bâk zawng chu hnim (shrubs) zingah an telh a ni. Thing hi chi hrang hrang nuaih khat lâi awmin an sawi a. Amarawhchu ram lum ruahtui tamna hmuna ngaw chhah pui puite hi tlawh pawh mang loh a la tam a, chuvangin thing chi engzât nge khawvelah hian awm a hriat dik tak tak theih loh. An tangkaizia sawi tur tam tak a awm naa tlêm tê chauh han sawi ila. Lei kal ral tur an vêng a, mihring tâna thil pawimawh ber tihngam tur oxygen an siam a, atmosphere-a carbon dioxide tam lutuk an vên mai bakah lei chunglâng temperature an vawng dai bawk.
Thingte hi eng chena sângin nge an than theih tih hi inhnial theih tak a ni. A teh dik pawh a harsa hle. Tunlaia an teh dan ber pakhat chu laser rangefinder an tih, laser hmanga teh a ni a. A pakhat leh chu han lawn chilh a, a ler atang hrui thlâk tawp chi hi a ni. Mahse hei hi tehsual a awl bâkah a tehtu tam takin an teh sâng hret thin nia hriat a nih avangin rintlâkah an ngâi ta meuh lo. Engpawhnise teh dan hrang hrang atanga an lâka tunlai thing sâng deuh deuh nia an hriatte chu han tarlang ila.
Coast Redwood (Sequoia sempervirens): 115.66 m (379.46 ft), Hyperion, Redwood National Park, California, United States
Coast Douglas-fir (Pseudotsuga menziesii): 99.76 m (327.3 ft), Brummit Creek, Coos County, Oregon, United States.
Australian Mountain Ash (Eucalyptus regnans): 99.6 m (327 ft), Hobart chhim lam, Tasmania, Australia
Sitka Spruce (Picea sitchensis): 96.7 m (317 ft), Prairie Creek Redwoods State Park, California, United States
Giant Sequoia (Sequoiadendron giganteum): 95.8 m (314 ft), Sequoia National Forest, California, United States
Tasmanian Blue Gum (Eucalyptus globulus): 90.7 m (298 ft), Tasmania, Australia
Manna Gum (Eucalyptus viminalis): 89 m (292 ft), Evercreech Forest Reserve, Tasmania, Australia
Shorea faguetiana: 88.3 m (290 ft) Tawau Hills National Park, Borneo thliarkâra Sabah hmun a mi.
Alpine Ash (Eucalyptus delegatensis): 87.9 m (288 ft), Tasmania, Australia.
Heng thingte hi an sâng hlawm thiau thiau khawp mai. Mizoramah chuan a han el pha an awm meuh awm lo ve. Ka thing hmuh sân ber chu Thingsulthliah daia kan leipui lû ami Thingdawl a ni. Feet eng zât nge kan teh thei ve lo va, sâng zawng kan tive ngiang mai.
Heng thing lian pui pui hnuaiah hian hnim chi hrang hrang nuaih têl tak meuh meuh an awm leh bawk a. Heng hnimte hi khawvel timâwitu leh tinuamtu, kan eitur min tumsaktu an ni satliah lo va, boruak nuam tak min siamsaktu leh kan boruak hip tur oxygen min supply-tu tha tak an ni.
Tin, Pathian chuan khawmualah chauh hian hnim chi hrang hrang a dah lo va, tuifinriat chhûngahte tak pawh khuan hnim chi hrang hrang a lo tam mai. Chung tui chhûng hnimin oxygen a siam chhuahte chu khawmuala thing leh mâuten oxygen an siam aiin a tam zâwk ngial awm e. Tuifinriat chhûnga hnim awmte hi a thente chu mâwi tak takte an ni hlawm a. Khawmuala thing lian pui pui ang erawh chu a awm ve lo a ni ang. Thing leh mâu, hnim leh pangpâr mawi tak takte hi han en ila Siamtu ropuizia leh A hmangaihna nasat turzia hi a lang chiang hle a ni.
4. Ni, Thla leh Arsite: A Ni Lina Chu
Pathian thilsiam zinga chanchin nei ngaihnawm ber pâwl leh scientist-te tiluhaitu ber pakhat chu Ni, Thla leh arsite chungchang hi a ni hial awm e. Kei pawhin lei leh van (universe) ka ngaihtuah hian ât mai pawh awl dâwn zâwkin zu hre ve hiala maw le. A han sawi tan dan pawh thiam har tak a ni.
Ni (Sun) Pui Roh Khi
Ni khi kan lei atangin mêl maktaduaih hlir 93 a hlâ-ah a awm a. Patling nilêng ban han tih satliah mai âi chuan hla tak a ni. Tin, Ni khi a hmunah chuan boruak zang ber chi hydrogen insawh muk mai a nih avangin kan leilung anga sak leh chang rum rût ang hi a ni lo va, a sat em avangin ni thei pawh a ni lo. A taksa pawn lam khi 6,000 C vela sâ a ni a, a chhûng lam phei chu 16,000,000 C zeta sâ a ni e an tih chu. Chutiang khawpa sâ chu han sawi uar vak ngaihna pawh ka hre lo zâwk. New Delhi-ah khuan chutianga sâ meiling kuttum tiat vel chu awm ta se Aizawl atang hian a la sâ viau ang. Chutiang taka thil sâ chuan atom te pawh a ek phel thei a, chuvangin Ni-ah khi chuan khawvelin kan hlauh em em hydrogen bomb chu englâi pawh hian (second tinin) metric ton maktaduaih 620 zet hi a puak ul ul reng mai a ni.
Chutiang tak chuan Ni chu eng chen nge a lo alh tawh hriat phâk a ni lo va, eng chen nge a la daih dâwn pawh kan hre pha lo. A hydrogen pai khian daih loh chin a la nei ngei dâwn tih chu scientist-te rin dan a ni a. Mahse chu chu a la hla deuh; kum tluklehdingawn nga vel la ni turah an ngai a ni. Tin, Ni khi a lian hle a, hawlh tlangin km 1,392,000 a ni a. Chu chu kan lei hawlh tlang lêt 109 a nih chu. Kan chenna khawvel lêt 330,000 a lian a ni. A rawng khi a vâr a ni a, lei atang hian a eng (yellow) angin kan hmu a, chu chu van rawng khi a dumpâwl anga lei atanga a lan vang a ni.
Tunhma deuh kha chuan Ni khi a awmna galaxy, Milky Away-a arsi dang awm zingah a tê pâwl niin an sawi thin a. Mahse chutiang em ema nikhua lo chu a lo ni bik lo; a awmna galaxy-a arsi za zela 85-te chu a âia êng lo zâwk an ni an ti leh tawh. Kan sawi tâk ang khan mei alh hlawm a nih avangin thlipui a thaw hum hum reng a, a alhte chu van sângah khawvel tiat tiat tur hi an thlâwk duai duai fo bawk.
Ni Heltute Planet-te
Ni khian heltu planet pariat (tun hma kha chuan Pluto nen pakua kan tih thin kha) a nei a. A hnaih bertu Mercury-in mêl maktaduaih 57.6 atangin a hel a. A hlat bertu Pluto (la tihram teh phawt ang) chuan km 5,913,520,000 (39.5 AU) atangin a hel thung.
Pluto sawi tâkah chuan inhnialna a chawh chhuah zin em avangin han chhunzawm thui hret ila a tha awm e. Amah khi hawlh tlangin km 2274 a lian a ni a. Thla (Moon) âi khian a tê hret a nih chu. Chutiang khawpa tê chuan heltu thla pali a nei ve tlat mai nia. Chungte chu kum 1978-a hmuhchhuah Charon te, kum 2005-a hmuhchhuah Nix leh Hydra te, kum 2011 July 20-a hmuhchhuah, hming mumal la pêk loh S/2011 P 1 te hi an ni. Mahse a heltute hi an tê hle a, entlang tha mi pawhin hmuh mai mai theih an ni lo.
Pluto hi kum 1930 khan an hmuchhuak chauh a. A têt deuh avangin planet zinga chhiar tel tur nge ni chhiar tel loh tur tihah mithiamte an inhnial nghal a. Eng tin tin emaw ni planet zingah chhiar tel a ni hram a ni.(Tunah chuan an telh leh tawh lo) Tin, a hming turah pawh hian an buai hle bawk. A hming phuah theihna right neitu Lowell Observatory chuan rawtna sangkhat zet a dawng a. A hmuchhuaktute zinga mi Clyde Tombaugh-a chuan an director Vesto Melvin Slipher-a chu miin an phuah hmaa phuah vat turin a râwn a. Lowell-a nupui Constance Lowell-i chuan Zeus tih a rawt a. A hnu lawkah Percival ni se a ti a. Chumi hnu-ah Constance ni se an ti leh a. Heng rawtnate hi a tlang lo. A hnu lawkah England rama Oxford khaw hmeichhe naupang Venetia Burney-i (1918-2009) rawt angin an planet hmuhchhuah thar chu Pluto an ti ta a ni.
Pluto hming an phuah dawn hian rawtna dang, Minerva, Cronus tihte nen an pathum hian bûk a ni a. Pluto tih hian vote zawng zawng a hmu a. Lawmmanah Burney-i hian pound nga a dawng a. Hei hi March 24, 1930 a ni. Tun hnu deuh hian Pluto zir chiang tur thlalem han tirh chhoh hi an sawi fo tawh a, mahse a hlawhtling mai thei lo. Kum 2003 khan rei tak sawiho a nih hnu-ah US sawrkar chuan Pluto zir chiang tur thlalem siam nan pawisa a dah hrang ta a. Tichuan mithiamten an han bawhzui char char a, kum 2006 January 26 khan Pluto han zir chiang thei tur thlalem New Horizon chu hlawhtling takin an kâp chhuak ta a. Tum anga a kal tluan zel theih chuan kum 2015 January 19-ah Pluto chu a han thleng dawn a ni (Heta thleng kan tih hi a han tum dawn tihna a ni lo, a han hnaih lai ber sawina mai a ni). He thlalemah hian a hmuchhuaktute zinga phusa ber Clyde Tombaugh-a vâp an dah nghe nghe.
Pluto hi a vawt hle a, a lum lai ber pawhin -230 C a ni hem mai. Aizawlah chuan +5 C a nih pawhin vâwt kan titawh hle a ni. Kum 75 zet chu Pluto hi ni heltu planet pakuana anga chhiar a ni thin a. Mahse a têt em avang te, amah tiat deuh ruau ruau, han cho pha ve mai tur chi an hmuhchhuah tâk fo avang leh thil dang dang avangin kum 2006 September 13 khan International Astronomical Union (IAU) chuan planet a nihna atangin an paih a, planet tê dwarf planet zingah an telh ta a ni. Pluto piah lam hla fê-ah sâwn Ni heltu dwarf planet an la awm nual a, chungte chu a hlat dan indawtin Haumea, Makemake leh Eris te an ni. Haumea hi artui ang deuha tung sawl a ni a, heltu thla pahnih a nei. Kum 2005-a an hmuhchhuah Eris hi Pluto nen hian a intiat thuak a. Amah heltu thla pakhat Dysnomia a nei ve a. Planet zinga chhiar tel an tum deuh uaih uaih thin.
Ni heltu planet-te chu Mercury, Venus, Earth, Mars, Jupiter, Saturn, Uranus leh Neptune te an ni. Mars leh Jupiter inkarah khian vaivut nawi atanga lung lian pui pui, kilometer za chuang chuang hawlhtlang chu Ni helin a maktaduaih têl an thlawk vir mup mup bawk a. Chung zinga lian ber chu a lai hawlhtlanga kilometer sangkhat bâwr vel Ceres an tih chu a ni. Tin, Neptune piah lamah sâwn Kuiper Belt an tih a awm a, chutah pawh chuan van lungnawi maktaduaih têl Ni helin an vir mup mup bawk.
Planet zinga Ni hnaih ber Mercury chu Ni atanga kilometer maktaduaih 57.6 a hla a ni a. Ni a hnaih avangin a sa hle a, a ro vawng vawng ringawt mai a ni. A dawttu Venus chu Ni atangin kilometer maktaduaih 107 a hla niin planet zingah a sa ber. Chhûmin a tuam tlat avangin a taksaa lumna kal ral tur kha a chhuak thei lo va, a inup sa ta em em mai a nih chu.
A pathumna chu kan chenna khawvel hi a ni a. Sawi tam a ngai awm lo ve. A palina chu Mars khi a ni a. Ni atanga kilometer maktaduaih 225.6 a ni. Khawvel ai hian a tê hret a. A hlat tawh deuh avangin a vâwt tawh khawp mai. Hêltu thla pahnih Phobos leh Demos a nei ve.
A pangana chu Jupiter a ni a, Ni atangin kilometer maktaduaih 772.8 zet a ni tawh. Kan chenna khawvel ai hian a lêt engemaw zâtin a lian a. Heltu thla pawh 63 zet a nei. Amah khi khawvel anga sakhat a ni lo va, boruak inhlawmkhawm a ni ber. Han tum ila chu kan pil thawih thawih dawn a ni. A chhûngah hian planet dang zawng zawngte hi an leng vek bawk.
A parukna chu Saturn a ni a, kilometer maktaduaih 1417.6 zeta hlâ a ni tawh. Saturn hian heltu thla 62 zet a nei ve bawk. Thla mang sawi tur a nei ve dawn lo tihna a nih chu. Heng a thla zinga 53 te chuan hming an nei. Saturn heltu thlate hi a tam zâwk chu an tê hle; an zinga 34 te chu kilometer sawm hnuai lam hawlhtlang chauh an ni a, a dang 14 te chu kilometer 50 hnuai lam hawlhtlang an ni. Amah hi tui aiin a sakhat lo zâwk a, chuvangin tuifinriatah hian rawn tum thei se chu a lâng nul nul dawn tihna a ni.
Saturn hian zungbun ang deuha hualtu ring a nei a. Chu chu a hmingthan phah hle. Amah hual veltu ring te chu an inthuah tup mai a. Entlang tha deuh hmanga en chuan a lang thei an ti. Amah hi mit lawnga hmuh theih planet hla ber a ni bawk.
Ni heltu planet hlat dan indawta a pasarihna Uranus khi Ni atanga kilometer maktaduaih 2852.8 zet a ni a. Heta tang hi chuan Ni pawh khi lang tê vau vau tawh tak a ni. Heltu thla 27 a nei ve a. Sawi thama lian an ni lo thung.
Planet zinga hla ber Neptune khi Ni atangin kilometer maktaduaih 4,497 zeta hlâ a ni tawh a. Ni pawh arsi lian deuh ang chauhin a lang tawh a ni. Ni lum ai tur pawh a awm tawh lo; a vâwt lutuk tawh a, rizai thuah sawm pawh sin ila Neptune-ah hi chuan awmzia a awm tawh lo vang. A vawh dan tlangpui chu −221.4 °C a ni. Tin, Neptune hi planet zingah chhiarkawp hmanga an chawh chhuah hmasak ber a ni bawk.
Live Science chanchinbu May 27, 2012 (as qouted by Competition Success Review YEAR BOOK 2013) in a chhuah dan chuan Brazil arsi lam zir mite chuan Pluto piah hla tâwk fê-ah sâwn kan lei let li vela lian planet dang an hmuchhuak a. A chanchin erawhchu an la hre chiang vak lo a ni awm e. Hei hi tak tak a nih chuan planet-ah chhiar tham a ni ngei ang. A hla tawh viau dâwn a, a vâwt tawh viau turah ngai bawk ila.
Heng Ni heltu planet inhlat dan leh inhip tawn dan hi a tâwk tea Pathian ruat an nih avangin khawvelah hian mihringte hi kan khawsa thei chauh a lo ni.
Vana Arsite
Ni khi arsi vantlâng a ni a, a lenzia pawh khawvel lêt nuaihthum chuang a ni kan tih tawh kha. Tin, Ni khi arsi bâwmpui galaxy pakhat, Milky Away, Mizovin Thlasik Kawng kan tiha awm a ni. A awmna galaxy-ah hian a tiatpui leh a âia lian arsi tluklehdingawn 200 zet awma sawi a ni a. Chung arsite chuan Ni ang bawk khian heltu planet nei ve ta se scientist-te sawi danin Thlasik Kawngah ringawt pawh hian mihringte chen theihna planet dang tluklehdingawn têl a awm thei a nih chu!
Ni khi Thlasik Kawng laibu (centre) atanga êng kum 25,000 – 28,000 inkâr bâwr vel, Orion Arm an tiha awm a ni. A awmna hmuna awm reng lovin Ni chuan Thlasik Kawng laibu chu second khata kilometer 251-a chakin a hel vut vut a. Hemi speed –a thlawk vut vut chung hian kan Ni leh a heltu planet pariatte hian eng kum khat (light year) zin turin kum 1,190 zet a duh a ni.
Tuna mihringin universe kan zir phâk leh kan hmuh phâk chu êng kum tlûklehdingawn 92 bial (46 radius-in) a ni a. Hemi chinah ringawt pawh hian arsi bâwmpui galaxy tluklehdingawn za zet awmin an ring a ni. Galaxy-te hi an inlen hleih ve hle. Hawlh tlanga êng kum 30,000 te an ni a, kan awmna galaxy Thlasik Kawng hi a lai hawlh tlanga êng kum 100,000 a ni. Galaxy thenkhatah chuan arsi maktaduaih sawm bawr vel chauh te an awm laiin a lian pâwlah chuan arsi maktaduaih hlir maktaduaih (1,000,000,000,000) an awm thei. Kum 2010-a arsi lam zir miten an hisap danin tuna mihringin universe kan zir phâk chinah hian arsi sextillion zathum (300,000,000,000,000,000,000,000,000,000,000,000,000) awm hialin an ngâi a. Tin, galaxy-te hi an inhlat hlawm hle; min hnaih bertu Andromeda khi êng kum maktaduaih 2.5 a hla a ni a. Kan lam pan hian a rawn thlâwk duai duai a. Tun atanga kum tluklehdingawn 3.75-ah khian kan awmna galaxy nen hian an insu dâwn a ni.
SCIENCE chanchinbu (January 12, 2012) chhuah danin scientist-te chuan Chile rama NASA entlang tha Chandra X-ray Observatory leh Atacama Cosmology Telescope atangin êng kum tlûklehdingawn sarih vela hla-ah sâwn arsi bâwm galaxy awm khâwmna cluster ropui em em mai an hmuchhuak a. An thil hmuhchhuah hi Astrophysical Journal-ah an chhuah bâkah American Astronomical Society meeting-ah an present bawk. He an thil hmuhchhuah hi a hmingah Spanish tawnga ‘thâu’ sawina El Gordo an vuah a. A lenzia chu kan awmna Thlasik Kawng tia thiau arsi bâwm 20,000 ang tiat vel a ni. A hmuchhuaktute zinga mi astrophysicist Felipe Menanteau-a sawi dan chuan he cluster-ah hian Thlasik Kawng tiat vel galaxy sâng têl tak meuh meuh a awm a. An zinga thenkhat chuan kan lei ang deuh planet-te pawh an nei ve maithei a ni an ti.
Heng van arsi chhiar sen loh let engemaw zata tamte hi khawvel siam laia siam an nih ve chu a rinawm chiah loh; he khawvel ngau ngau pawh hi eng chena rei nge a lo awm tawh tih a hriat si loh a. Sawi fiah zawh rual a ni lo ve.
Vana arsi chhiar sên lohte khi han ngaihtuah chiang chet chet ila a mak a, a ât chhawlh theih a ni. Heng thilsiam ropui tak tak leh mak tak takte hian Pathian ropuizia chu an puang a. Chu zawng aia mak leh ropui zâwk chu heng zawng zawng Siamtuin inngaitlâwm taka Bethlehem ran in a rawn bel thei kha a ni. Vantirhkohte chuan mak an ti a, Setana pawhin tihngaihna a hre lo. Keini tlansate tân erawh lawmna chuai thei lo min petu a ni.
5. Tuifinriat Nungchate leh Savate: A Ni Ngana Chu
Pathian chuan ni li chhûnga a thilsiamte chu tha a la tihle vek a. Tunah chuan rannung leh savate chên nân khawvel chu a inpeih ta. Tuifinriatah chuan sangha ei duh zawng hnim chhiar sên loh a awm tawh a. Khawmual lah chu ngaw dur pui pui leh phaizâwl phûl hmun hring mâwi tak takin a khuh bawk a. Tuikhawthla mâwi tak tak te, pangpâr mâwi tak tak leh tlâng pâwng nalh tak takte chu nunna nei dangte luah loh atan chuan an uihawm lutuk a ni.
A hmasain Pathian chuan tuifinriata cheng chi sanghate leh nungcha dang reng reng chu a hmaa a lo duan lâwk tawh angin ‘Awm rawh se,” a ti a. Chu veleh tuifinriat chu sangha te reuh tê tê, ngha-meidum tih angreng leh sangha lian pui pui shark leh whale ten an khat nghal a. Anmahni chi ang theuh zela awmin tuifinriat chu an luah khat ta mup mai a ni.
Whale hi sangha anga sawi leh chhiar a ni naa hnute tuia no chawm chi a nih avangin ransa (mammal) zingah chhiar tel a ni. Khawvela rannung lian ber a ni a, a chuap ringawt pawh Santro car tia lawih a ni thei. Whale zingah rau rau pawh blue whale ho hi an lian ber a, fit 108 a sei, ton 190 (USA-ah chuan ton khat hi kg 907.18 a ni) a rit te an ni hawlh hlawm. An hmanhmawh deuh châng chuan dârkâr khatah mêl 30 a chakin tui an hleuh thei a, hun pangngaiah chuan dârkâr khatah mêl 12 vel an hleuh tlângpui. An naute pawh chawm an hautak khawp mai; ni khatah hnutê gallon 100 atanga 150 te an hne thei a ni. Tin, an lêi hi a sei hle a, blue whale puitling lêi chu sâi chen zet a ni thei.
Blue Whale-te hi a ruala hmuh tur an vâng hle. A inkawpa awm chu hmuh tur an awm fo va, chu pawh chu nufa an ni duh khawp mai. An chaw tamna hmunah erawh chuan a rualin tam tak an awm ve fo thung. Tui chhûngah minute sawmhnih emaw chauh an awm theih avangin boruak hip tura an zuan chhuah fo a ngâi a. Chuvangin hmuh pawh an awl phah hle. Tin, chaw an ei tam thei khawp mai. An duhzawng tak an hmuh chuan ni khatah quintal 40 dawn te pawh an ei thei a ni.
Hetiang tak hian sangha thenkhat chu lian mah se Pathian siam ve tho sangha thenkhat, entirnân Indonesia rama an hmuhchhuah thar Paedocypris an tih te chu centimeter khat em pawh tling lo, a sei berah millimeter 7.9 chauh a ni.
Sangha Hlauhawm
1.Great White Shark
He shark hi shark zingah rau rau chuan a lian ber a, khawvel tuipuiah hi chuan an awm vek a, vaukam hnaih lamah an cheng deuh ber. Meter ruk (fit 20) vel zeta sei, ton ruk zeta rit a ni thei bawk. Sangha zinga sangha dang leh rannung dang ei chi zingah chuan a lian ber a ni. A tlângpuiin vanduai hle loh chuan hetiang sangha hian mihring a bei meuh lo. Thil a seh tam tak chu eng nge an nih hriat tuma a seh chhin an ni a. Mihring a sehte pawh hi eng nge an nih en chhin nana a sehte an ni deuh ber.
2. Box Jellyfish
He sangha (sangha kan tive mai pawh a, sangha ang tak tak chu a ni lo) hi a bial a ni a, mei ang deuh sei fê fê, fit 15 zeta sei sawmruk lâi a nei a. A meiah chuan tûr hlauhawm tak, patling sawmnga zet tihlum thei tur a awm zel bawk a. He sangha avang hian mi an thi zauh zauh tawh a ni. Australia, Phillipines leh tropic ram tuipuiah te an awm deuh ber.
Tuifinriat chhûng hi kan la hre tlêm hle. Tui thûk chin tak tak phei chu mihringte hian kan la zu pawh thei lo va, chuvangin eng tiang chiah ropui leh mak nge a nih pawh hi hriat theih tak tak a ni lo. A zir mite erawh chuan an zir phâk china nunna awm leh chung nunna nei sangha leh rannung chi hrang hrangte chu an hmuhin a ropuizia an hrilhfâk a ni. Tuifinriat mawng thim mup maiah khuan rannung mak tak tak awm ngeiin an hria a. Chakâi mit nei lo maktaduaih têl vâk dul dul te, rannung mak tak tak, sangha pawh ni lo, eng ransa zingah mah chhiar telh remchang mai lo leh hming han phuah mai hleih theih lohte pawh an awm teuh awm e.
Khawmualah pawh hmuhnawm tham nungcha tinrengte chu Pathianin a dah a. Ransa lian pui pui sâi atanga fanghmir thlengin anmahni chi awm dan theuhin Pathian chuan a dah a. Heng rannungte hi a hranpaa zir fê tham vek an ni. Fanghmir ringawt pawh hi chi hrang hrang 12,000 chuang a awm. Khawvel hmun tin an luah tih theih a ni. Antartica, Greenland leh thliarkar tlêm tê tih lohah chuan fanghmirte hi khawi hmunah pawh an awm tihtur a ni. Fanghmir finzia leh themthiamzia chu hahipa sawi tham a awm. A ruala awm chi an ni a. South America-a Army Ant (Ecitron Burchelli) an tihte chu bu khatah 700,000 te an awm thei. Scientist-te sawi danin khawvela fanghmir zawng zawng leh mihring zawng zawng hi kan inbûk tâwk vel a ni awm e. Awih chu a harsa deuh; mahse ‘Ka hria alawm’ ti theiin an sawi tlat mai a, hnial buai lo teh ang. Khawvela fanghmir zawng zawng hi mihringte hian insem ila maktaduaih 1.5 theuhin kan chang dâwn a ni an ti. Amazon luiruam ngaw kârah phei khu chuan an han sawi tam khawp a, acre khatah fanghmir maktaduaih 3.5 vel awm zel ang a ni an tih lehpek chu! In (bu) lah chu an han nei sei thei khawp a. California-a fanghmir bu pakhat an hmuh chu mêl zaruk zeta sei a ni an ti. Fanghmirte hi an dam rei lo hle, kan hmuh tam zâwk, hnathawktute hi ni 40-45 vel an dam a. A lalnu erawh chu kum 20-30 a dam thei. An lalnu a thih hnu hi chuan thla tam an daih tawh lo; an rêm deuh zel a ni.
Savaten chaw an zawn thiamzia leh bu an chheh thiamzia pawh sawi tam a ngâi lo ve. An thla insiam dan ringawt pawh hi lu tihai tham zeta changkang leh mak a ni a. Tin, khawvelah hian sava damlai tluklehdingawn khat atanga tluklehdingawn hnih inkâr vel awma ngaih a ni.
International Union for Conservation of Nature-ho sawi danin tun dinhmunah hian sava chi hrang hrang 9,865 la awma hriat a ni a. Chung zinga 1,227 te chu an mang mai hlauhawm khawpin an tlêm tawh a. A bikin an zinga 838 te phei chu an ral lo chauh a ni. A dang 7,735 te chu la hlauhthawm loha ngaih an ni a, 65 te chu an dinhmun la sawi mai theih loh an ni thung. Kum AD1500 atang khan sava chi 133 zet an mang tawh nia hriat a ni a. Tin, sava chi lite chu sahuanah chauh hmuh tur an awm tawh bawk.
Khawvela sava lian ber chu Ostrich a ni a. An rihzawng pawh pound 220 atanga 350 thleng niin fit 7-9 velin an sâng thei. Ostrich-te hi an tlan chak hle a, dârkâr khatah mêl kilometer 70 vela chakin dârkâr chanve vel an tlan thei a ni.
Khawvela sava tê ber vethung chu Bee Humming bird a ni a. Inches hnih a chuang awrh a ni. A thlawh lâiin he sava tê hi minute khatah vawi 300-500 inkâr vel a thaw hman a. A lungphû pawh minute khatah vawi 30 atanga vawi 1,500 inkâr a ni thei; a chêt hah dan azir a ni. Humming bird hi sava zingah a hnung tawlh zawng te, a letling zâwng te leh a sir zâwng tea thlâwk tawn vel thei awm chhun a ni bawk.
Sava thenkhat chu chhim tâwp leh hmar tâwp kar tawnin an pêm kual thin a. Hmanraw engmah hmang si lo mêl sang tam tak kawng bo miah lova an pêm kual thei hi mithiamte mak tih ber pakhat a ni.
Tichuan heng Pathian thilsiam mawi tak takte hian leilung chu an luah khat ta a. A tira Pathian siam dan tak kha kan hmu ve lo va, engtiang taka mâwi leh nuam ni ang maw?
6. Ransa, Rannung leh Mihring: A Ni Rukna Chu
Ni rukna zing khua a lo vâr a, Ni a chhuak ta. Khawvel chu thing leh mâu, pangpâr mawi tak tak leh phûl hnim hring mâwi em em maiin a khuh chhuak vek a. A mawizia chu suala tlu tawh mihringte hian kan suangtuah phâk awm lo ve. Chumi ni chuan Pathianin khawvel chu a han en a, thil kim lo a la awm tih pawh a hre chiang kher mai. Chutah a thiltihtheihna chhui sên rual loh hmang chuan ransa tinreng mai chu a han siam leh ta a. Chawhnu tlâng a han her meuh chuan khawvel chu ransa mâwi tak tak leh inang lo tak takin an khat leh ta hmur mai. Ransa thenkhat chu lian pui pui an nih laiin thenkhat chu te tâk tê tê an ni a. Mahse a tua mah chu an indip lo; Pathianin an awm dan tura a ruat ang chiahin an awm a ni.
Tunah hian khawvelah ransa chi hrang hrang maktaduaih khat vel awmin an hria a. Hei hi Pathianin khawvel a siam tirh âi kha chuan an tlêm zâwk daihin a rinawm. Engpawhnise maktaduaih khat pawh hi tam tak a ni. Rûl ringawt pawh hi chi sangruk vel awmin an hria a, kum tin a chi thar an la hmuchhuak lehnghal. Maimawm ringawt pawh hi chi hrang hrang 7,000 zet awmin an sawi nia! Chu mai a la ni lo, hrikhrah ringawt pawh hi chi hrang hrang 3,000 zet a awm an tih chu! Khawvelah hian bawng tluklehdingawn khat vel a awm a, chung zinga maktaduaih 200 chu India ram ami a ni.
Utawk thlawk thei an tih, flying frog te hian ni khat chhungin an vun rawng an thlâk fo thei. Chhun Ni sat lai chuan a hring pâwl angin a lang a. Tlai lamah a hring a, zanah a dum thung. Boas rûlte hian an lû-ah thil lum hre thei em em mai taksa pêng khat pit tih chu an nei a. An bul hnaia thisen lum chi ransa dingte chu an hre thei a ni.
Ransa zingah mihring tana tangkai tak tak, bâwng, beram, kel, ui, vawk, âr, sakawr, sabengtung te an awm a. Hengho hi mihringin kan vulh a, an tangkaizia hi chu sawi lo mai ila. Tin, thenkhat sawi danin mihringte hian kum 4,000 kal ta atang khan rannung vulh thar kan nei miah lo an ti. Tuna kan ranvulhho hi kum 4,000 kal ta khan mihringin an lo vulh vek tawh a ni. Engpawhnise an tangkaina lam chu kan hriat sa a nih avangin rannung zinga a hlauhawm lam i han sawi zâwk teh ang.
8. Poison Dart Frog
Hetiang utawk hian amah beitute lo beih lêt nan a hnungzângah hian tûr chak tak mai, patling sawmin an thih pui theih tur a nei a. Mahse vanneihthlâk takin mihringin kan man hian a tûr chu zu chhuah ngai miah lo va. Hetiang utawk hi South America-ah an cheng ber.
7. Africa Ram Lâwi
Heng lâwi chi hi ton 1.5 a rit, meter 1.7 a sâng, meter 2.8 a sei an ni thei. An thin tihrim chuan an ki hriam fahran mai hmangin mi a bei thut a, an hmêl en aiin an che rang bawk si a, hlauhawm tak an ni. Kum tin mi engemaw zât a si hlum thin a. Africa-ah chuan ransa dangin mihring an tihhlum belhkhawm aiin hetiang lâwiin mihring a sik hlum hi an tam zâwk an ti.
6. Savawm Vâr
Hetiang savawm chi hian mihring a bei mai mai lo naa a tawh fuh vêk chuan a vawikhat benah mihring lû te hi chu a tin hmangin a chhawk zawk zawk thei. Hmâr tawp vûr rama awm a ni a, elephant seal te, walrus te, whale te, rheindeer te leh savawm dang te pawh a ei thei vek a ni.
5. Sâi
African Sâite khu hetia en ai hian an kawlh daih mai a. Kum tin mihring 500 bâwr vel an tihlum ziah ang a ni.
4. Awle
Awle thenkhat Saltwater Crocodile an tihte hi awle chi-ah chuan an lian ber a, fit 15 atanga 21 thleng te pawh an ni thei. Australia hmar lamah leh Southeast Asia-ah an awm deuh ber. Ransa lian tak takte pawh a ei fo. Ransa a seh chuan a vir pui chiam thin a, chu chu an dawl lo tlangpui bawk. Tui chhûngah chuan dolphin sangha anga chakin a che vel thei a ni..
3. African Sakeibaknei
Africa ram pakhat, Tanzania-ah chuan kum tin sakeibakneiin mi za vel sehhlum ang a ni an ti. Sakeibaknei hi ramsa zingah a lalber an ti thin a. A huai a, a sual a chhuah chuan hlauhawm tak a ni.
2. Asia Khawmualpui Chawngkawr
Asia khawmualpuia awm lo atan a tha mawle. He chawngkawr hi khawvela rûl tûr nei tha ber ni lo mah se a hmang ngun ber thung a. Chuvangin a hlauhawm khawp mai. Kum tin rûl chuk avangin mi 50,000 vel an thi ziah a. Chawngkawr hian a thawh hlâwk khawp mai.
1. Thosi
Thosi seh avangin kum tin mi maktaduaih hnih vel an thi ziah a. Kum tin mi maktaduaih 70 hnenah Sikserh natna an theh darh ziah bawk. Rannung âwm nêm tê si, anmahni avanga thi hi khawvelah an tam em em reng mai. Chuvangin TV Channel lar tak Animal Planet chuan rannung zinga hlauhawm berah a puang a ni.
Pathianin ransa a siamte chu anmahni chi ang theuh zela awm turin a siam a, chuvangin sakei leh sakawr an inthlah pawlh thei lo va, bawngin beram a hring thei hek lo. Hetianga nghet taka mahni chi ang theuha an awm hi a hlû a, a mak a, a ropui em em a ni. Sakei leh sakhi te hi inthlah pawlh thei ta se khawvel hi a buai zo vek ang. Zâwngin sakei thlah se a thlah ve lo a bula zâwng dangte nen an khawsa ho thei dawn lo va, nature hi a buai zo vek dâwn a ni. Mihringte hian savawmte hi hring ta daih mai ila mihring dangte nena kan khawsak hona a buai vek ang a, khawvel hi a mumal thei hauh dawn lo a nih chu.
Tin, ransa zinga a nu leh pa an awm lehzel hi a mak hle bawk. Evolutionist-hovin eng tin nge heng thute hi an hrilhfiah ka hre lo va. He thuziak hi evolution leh creationism bûkna tura ziak a nih loh avangin kan sawi thui lo vang. Zêp lohah chuan sawi thui chu châkawm tak a ni. A nu leh a pa inpawlna tel lova inthlah pung thei miah lo ransate hi eng tin nge ransa mawl ber amoeba atanga an lo insiam theih le? Sex awm hmâ hian engtin nge an lo pun ngawt theih tih hi zawhna pawimawh tak a ni.
Mihring
A tâwp berah Pathian chuan Ama anpui mihring a siam ta a. Mihring hi vaivut hmanga a siam a ni a. A siamna hmanrua lei chanchin hi ka hre tam lo khawp mai. Mihring taksa za zela 70 hi tui a ni e kan ti a. Mihring taksaa heti zât tui awm sawi ri miah lova a tlêm zâwk (tui ni lo zawng) sawi rik a ni hi a mak hle bawk.
Tichuan mihring hmasa ber Adama chu Zirtawpni chuan a rawn piang ve hlawl mai a. A bul vela ransa mak pui pui, a inkawp zela lo awm fer fur te, pangpâr mawi tak tak leh phaizawl mâwi tak tak te, sava chi tin reng hrâm nuaih nuaihte chu mak a ti viau ang a, zawhna pawh a ngah ngawt ang. Eng vangin nge engkim hre lâwk vektu Pathian chuan Adama kawppui tur hmeichhia hi a siam ve nghal mai loh? Adama chuan ransa mak pui pui leh sava thlawk nuaih nuaihte chu a han thlir a, a rilru a kim thei lo. A khua a har ru ta ngawih ngawih mai a nih chu. Mihring hian hmangaihtu kan mamawh ang bawkin hmangaih tur kan mamawh; kan mamawh dan a inang reng. Pawisa te, rangkachak te, lunghlû te hi kan ngaihlûin kan dah sâng hle a, mahse hengte pawh hi min hlut puitu leh min tawmpuitu an awm loh chuan engtihna mah an ni lo.
Kan thurin bu Bible-a inziak hmasa ber chu “A tirin Pathianin lei leh van a siam a,” tih a ni. Thil hmasa ber hi a pawimawh ber ni zel dawn se chuan Pathianin lei leh van a siam thu hi Bible chhûnga thu pawimawh ber tihna a ni ang. Kan sawi thiam dan azir leh kan hmui themthiam dan azirin a nih pawh a ni maithei reng a ni. He Bible châng kan chhiar phat hian Pathian ropuizia, engkim tithei, engkim chunga roreltu a nihzia kan hmu nghal a. Chutiang taka engkim tithei, engkim siamtu, engkim chunga roreltu ni bawk chu Pathian ni tlâk, Pathian niawm reng leh biak tlâk Pathian ngei a ni tihna a ni bawk.
He thu, Mizo Bible-a thumal hmasa ber ‘a tir’ tih hi eng tianga rei tawh nge a nih tih hi hriat châkawm tak a ni. Scientist tam tak chuan lei leh vante khi kum tluklehdingawn 13 atanga 15 inkâr vela upa niin an hria a. Kan chenna khawvel bik hi kum tluklehdingawn li leh a chanve vel niin an hre bawk a. Chu chu a dik leh dik loh fiah theih rual a ni lo. Pathian erawh chuan, “Kei Alpha leh Omega, a Hmasaber leh a Hnuhnungber, a Bul leh a Tâwp ka ni,” a ti (Thupuan 22:13). Chu pawh chu mihring finna leh ngaihtuahna hian eng chen nge ni tawh ang a ngaihruat thiam lo a ni ber.
Pathian thu lam atanga ‘a tir’ chhuitu lar ber chu Ireland ram pum puia kohhran hotu Anglican Archbishop, James Ussher-a (1581-1656) kha a ni. Ani chhût dan chuan Pathianin khawvel a siam kum kha BC 4004 a ni a. Hei hi Bible-a inthlahchhawn dân inziak hmanga a chhût a ni. A thianpa Bishop Lightfoot-a (1602-1675) phei chuan a han chhût chipchiar khawp a; BC 4004 October 23, zing lam dâr 9:00 chiah (45th Meridian Time) niin a sawi. Juda mithiamte chuan BC 3761 October 7 niin an chhût chhuak bawk. Bible-a mihring inthlah chhawn dânah hian mi thiamte chuan Juda-te khân hmaih an nei zauh zauhin an hria a, chuvangin an chhût dan hi a inang thei lo a ni.
Engpawhnise hengte hi a awihawm tih avanga sawi kan ni lo tih kha hre reng ila. Tuman kan hre tak tak lo tihna a ni mah zâwk.
Science lam atanga ‘a tir’ tih ngaihdan lar ber leh sawi hlawh ber chu Big Bang Theory hi a ni. He ngaihdan pawmtute chuan universe lo intanna chu Planck epoch (or Planck era-Max Planck-a hming chawia phuah) a ni a. Chu chu hun lo intanna pawh a ni. Chutih hun lai chuan kan chenna khawvel leh arsi kan hmuh phâk universe-a thil awm zawng zawng leh thahrui zawng zawng hi hmun khatah an awm khawm vek a, (a tawi zawngin) chu chu a ruh em em a, a sa bawk a. A hmingah cosmic egg an vuah a. Mahse chu cosmic egg chu engtia lo awm nge a nih a, eng tianga lo awm thei mai nge a nih chu tuman an sawi chiang thei lo. Chu cosmic egg chu energy inhlawm khawm a ni ber e. Chu thil muk lutuk leh thahrui hlâwm chu kum tluklehdingawn 13.7 vel kal ta khan a puak ta dur mai a. Tichuan chu thil puak darh lêng ta chum chum mai chu tuna lei leh van universe kan tih hi a lo ni ta mai a ni an ti a. Hei hi scientist-ten ‘a tir’ tia an sawi dan chu a ni.
Kan naupan lâi chuan Pathian chu khawvel a siam hma lawka lo piang chawp niin kan hre thin. Vawikhat pawh kan thianhovin kan sawi khawm a. Pathian chuan a taksa dang siam nân a bân a siam hmasa ber a, chumi hnu-ah a taksa dang chu a siam chauh a ni tiin kan sawi khâwm ve laih laih a. Chu chu naupang kum nga mi vel kan nih lâia ‘a tir’ kan ngaihruat thiam ve dân tâwk chu a ni. Mahse Pathian chu chatuan mi, chatuan atanga lo awm tawh, bul leh tâwp nei lo a ni a. Chuvangin universe, lei leh van zawng zawngte khi tunhma kum 6,000 emaw vel leka insiam chu ni theiin a lang lo. Kei chuan chutiang leka upa ni tura ka dah chhin hian ka ui a. Pathian ropuizia leh chatuan mi a nihzia nen pawh inkalh deuh zawk hialin ka hre thin. Mahse chu chu keima ui thu mai a ni e.
Bible sawi danin a tir chuan khawvel hi a thim mup a, tuiin a chim reng bawk a. Chutiang dinhmunah chuan engtianga rei nge a lo awm pawh hriat rual a ni lo. Amarawhchu khawvel hi nunna nei rannung, thing leh mâu leh mihring chenna tur atan renga buatsaih a nihna chu nunna neiin an mamawh hmasak ber tuiin a lo chim reng hi a ni.
Pathian chuan he khawvelah hian nunna a siam dawn avangin nunna atana mamawh hmasa ber tui chu a lo dah lâwk ni te pawhin a lang bawk. Tui hi hydrogen atom pahnih leh oxygen atom pakhat inbelhbawmin a siam a ni a, mak tak a ni ringawt. Thil alh duh em em mai pahnih infin chuan thil alh thei miah lo, thil alh haw em em, khawvela kangthelhna tha ber zu siam tlata mawle! Tin, a inbelhbawm tawh lah hi phelh a harsa em em lehnghal. Tunah hian scientist-te chuan tui molecule phelh darh dan chu an thiam tawh a. Mahse a la hautak deuh hlek avangin chutia mahni hman hun huna phelh darh mai theih chu a la ni lo deuh.
Mihring taksa za zela 70 hi tui a ni a. Kan thisen za zela 80 hi tui a ni leh a, kan tihrawl za zela 75 hi tui a nih bâkah kan ruh ngei pawh hi za zela 50 chu tui tho a ni. Kan thluakah hian cell tluklehdingawn 15 atanga 40 inkâr a awm a, kan thluaka cell te chu za zela 80 tui bawk a ni. Tui dahna ip kal thei kan ni ber e. Heti taka kan taksa hian tui chu a pai hnem avangin tui hi kan mamawh tam hle a. Ni tin no riat tal kan mamawh ang a ni.
Mihring taksa-ah chauh hian tui hi a tam lo. Vaimim fang hi za zela 70 chu tui a ni a. Alu pakhata tui awm zât chu za zela 80 a ni. Tomato leh fanghma pumkhata tui awm zat chu za zela 95 lai a ni bawk.
Tui hian kan chaw eia chakna awm chu a lo tisawm a, kan taksa hmun hrang hrangah a phur kual thin. Kan chaw ei chu thahruiah a lo siam a. Chutah kan taksain a mamawh tawh lohho chu phur sawn lehin taksa pâwn lamah a paih chhuak thin a ni. Chaw tel lo chuan thla khat lai pawh a dam theih a, tui tel loh erawh chuan chawlhkâr khat emaw chauh kan dam thei (kan awmna hmuna zirin). Mak tak mai chu kan taksa za zela 70 hi tui a ni a. Chutiang tak chuan bucket-ah lei nawi no 30 leh tui no 70 dah pawlh ila, a tui pur ringawt ang a, thil engemaw hmêlhmang nei siam nan a hman theih hauh loh ang. Mahse Pathian chuan hetiang proportion chiah chiah hmang hian mihring te leh thlai te hi a siam thei si a ni.
Tuifinriat tui chu a al tih kan hria a. Pathianin khawvel a chei that hmaa lei tuamtu tui hi a al ve em? Hei hi zawhna awm tak pawh a ni. Tuifinriatah hian khawmual atangin lui a luang lut reng a. Chung luite chuan an pal tlang leilunga chi awm chu Tuifinriatah chuan an phur lût zel a. Tichuan Tuifinriata tui chu niin a em lum a, tuihu-ah a lo chang a. Tuia chi awm chu tuihu-ah a chan ve theih loh avangin chi chu a lo tam hret hret a, Tuifinriat chu a lo al ta mai a ni.
Hei hi chhanna tha tak niin a lang a, mahse a dik si lo. Dik se chuan Tuifinriat khu a kum telin a al tial tial tur a ni. Mahse scientist-ten an test tirh atangin Tuifinriat tui khu a al ngaiin a la al reng a. Chu bâkah khawmuala chi awm zawng zawng aiin Tuifinriata chi awm khu a tam zâwk daih a ni. Tuifinriat tui mêl khat bial (cubic) zelah chi ton maktaduaih 166 zel awm anga chhût a ni a. Chu chu khawmualah la chhuak ila chi tlang fit 500-a chhahin khawmual hi a tuam chhuak vek thei ang. Chung chi za zela 85 chu sodium chloride – kan chi liah thin pangngai ang hi a ni nghe nghe a. Chung zozai chi chu khawi atanga lo kal nge?
Rin dan mai lo chu sawi theih a ni lo. Scientist thenkhat rin dan chuan hman lai, Tuan leh mang kal tawhah khan khawvelah hian tlangkâng nasa deuh mai a lo awm tawh a. Chu tlangkang râpthlak tak mai chuan leilung pawn lânga chemical awm dan hi a tidanglam a nih an ring a. Hei hi Bible lam atang pawhin ‘a dik awm mang e’ an ti bawk. Sodom leh Gomora chanchin kan chhiar chuan Pathianin an sual avangin a hrem a. Hrem pumpelh tuma tlanchhuak ve Lota nupui chu kawng lakah chilungah a chang tih kan hria a. Helai ruam, Sodom leh Gomora awmna ruam hi Bible chuan “Chi ruam” (Valley of Salt) a ti a (Deut. 29:23; 2 Samuela 8:13). He ruam hi tuna Tuipui Thi, khawvela tui al ber awmna hmun khu a ni. Kum 4,000 kal ta pawh khan ‘Tuifinriat Al’ tia hriat a lo ni tawh reng reng bawk (Genesis 14:3). Scientist-ho sawi danin Tuipui Thi khu tun hma atangin a al dan ngai rengin a la al a nih chu. Tuipui Thi leh a chhehvel ram en khuan tunhmain tlângkang nasa tak a lo tuar tawh thin tih hai rual a ni lo.
Tuilêt lâi khan nasa takin tlâng a kang tel niin a lang a (Genesis 7:11). Kha thil thleng râpthlak tak kha Tuifinriat tui lo al chhan niin mi tam tak chuan an ngâi awm e. Mahse heng hi theory mai a ni tih hriat a tha. Thil thleng tak tak, hnial rual loh thudik anga sawi pawr chiam chi a ni awm lo ve. Mahse thil mak deuh a awm, Tuifinriat tui al dan hi a chhûnga rannung leh hnim awmho tân a tâwk chiah zu nia.
Tin, thil dang reng reng hi chu a vawhin a sâwng tê thin a. Tui danglamna leh Pathian themthiamzia lanna chu a khang (vûra a chan) veleha a zâng zawk tlat leh a lian ta sawt hi a ni. Vûr hi tui pangngai âia a zân zâwk avangin tuiah a lâng thei a. A inhlawm khawm khân rit zâwk se chuan tui chhûngah a pil ang a, chu chuan tui chhung lam kha tivawtin sangha leh rannung dang reng reng chuan an thih phah nasa hle ang. Mahse mak tak maiin vûr chu tui aia a zân zâwk miau avangin a lâng ta a. Tuifinriat leh lui tuite vûrin chhah deuh maiin an bawh khah tlat hian pawn lam boruak vâwt lakah tui kha a him hlauh a, chu chuan tui chhunga rannung awmte kha a vêng ta zâwk a ni. Pathian themthiamzia hi a mak hle lo maw? Hetiang hi tihpalh thila lo thleng niin kan ring em?
Lei pâwn lâng hmun lia thena hmun thum zet hi tui a ni kan tih tawh kha. Hei hian tuifinriat chhung zau turzia leh ropui turzia min ngaihtuahtir theiin ka ring. Tuifinriat mawngah khuan phâizawl zâu pui pui, khawmual phâizâwl lêt engemaw zâta zâu te, khâm khawkrawk tak tak leh lungpui lian pui pui te, pûk thûk tak tak te, tlâng sâng tak tak te a awm a. Tlângdung sei pui pui, khawmual tlângdung sei ber Andes tlângdung lêt engemaw zâta sei te pawh a awm bawk. Chung tuifinriat hnuai tlângdung zingah chuan Atlantic tuipui lailia tlângdung, chhim leh hmar zâwnga inkhawh Mid-Atlantic Ridge (MAR) khu a sei ber awm e. Hmar tâwp lam Greenland atanga chhim lam zawnga inkhawh pheiin South Africa piah hla fê-ah Indian Ocean hnuaia tlângdung ve bawk nen a inpawh a. A sei zawng hi kilometer 40,000 zet a ni. He tlângdung hi tuifianriat thûk taka awm mah ni se Iceland thliarkar velah chuan tuipui chung lamah a rawn lawr pha a ni.
Khawvel inrelbawl dan chi hrang hrang en hian Pathian ropuizia leh themthiamzia a lang chiang em em a. Sawi sên a ni lo. Chuvangin a tira Pathianin khawvel a siam dan indawt chho hmang hian titi kan han vâwr dâwn a ni. Ka duh duh ka hawl kual ve dawn a ni a, a ngaihnawm meuh ang emaw chu. Lehkha ziah hian mi endik tur ni miah lova zalen taka mahni duhlam hawi hawi ziah hi nuam berin ka hria.
1. “Eng Lo Awm Rawh Se” A Ni Khatna Chu
Khawvel chu a chhia a, a ruak a, a thim mup mai a. Hmêl mumal pawh a pu lo niawm tak a ni. Chu khawvel thim mup mai chu Pathian ropuina chuan a han tiêng ta phût mai a. Hmu ve thei ila a hmuhnawm ngawtin a rinawm.
Pathianin khawvel a siam thu kan sawi hian tuman ‘a ni khatna-ah’ tui a siam thu kan sawi tel ngai lo. ‘A ni khatna-ah êng a siam’ kan ti vek. Tui chu thil lo awm sa, eng tik lai atanga lo awm tawh nge a nih tuma hriat loh leh an sawi ngai loh a ni. Tui chung chu a thim mup a, Pathian Thlarauvin a awp tih kan hria. Eng chen nge chutiang chuan tui chung thim mup mai chu a lo awm tawh hriat phâk a ni lo va, keini ang duang chuan hriat tum chi a ni hek lo. Bible pawh a ngâwi tlat. A ni khatnaa êng a siam thu a sawi ringawt mai a ni.
Eng (light) hi amaha lo awm ngawt thei a ni em? Ni tin khaw êng hmu thei mit tha pangngai nei chuan ngaiah kan nei a, kan ngaihtuah zui lutuk vak lo. Mahse êng hi zir tham a awm a, chanchin pawh a nei ngaihnawm khawp mai.
Eng hi hmuh theih leh hmuh theih loh a awm a. Amarawhchu a eng ngau ngau hi chu hmuh theih pakhatmah a awm lo thung. Engin thil engemaw a va chhun a, chumi lo sawhkhawk leh atang chuan eng nge a va chhun kha kan hmu thei ta a. Chu chu êng kan tih tak, hmu theia kan inhriat tâk bera chu a ni. Eng ni ve si, chutianga hmuh theih loh chu a awm nual a, chungte chu cosmic ray te, x-ray te, ultraviolet ray te, gamma ray etc., te an ni.
Eng zung kan tih ray of light hi photon hlawm fâwn vel ti ila a Mizo tawngin a hriat a awlsam ber awm e. Heng photon te hi anmahni ringawtin a lo awm thei lo; tlâng sâng luiten hnâr an nei ang hian lo chhuahna hnâr a nei ngei thin a. Chungte chu Ni te, mei alh te, electric te, van sâng hla taka arsi etc., te an ni. Photon te chu chakna thahrui te reuh tê tê (particles of energy) hlawm fâwn vel a ni a. An têt em avangin mit lawnga han hmuh mai mai rual a ni lo. Tuifâwn angin a fâwn a. Mahse a fâwn wave hi a tawi em avangin teh mai mai theih a ni lo. Scientist-te erawh chuan a tehna an nei a, chu chu angstrom an ti. Angstrom maktaduaih 250 chu insi thapin rem tlar ila inchi khat vel bâkin a sei lo vang.
Heti taka wave length tâwi hi scientist-te chuan thil dang teh nân an la hmang thei cheu nia! Atom len zawng teh nân leh sahbawn phuan pan tak mai chhah zâwng teh nân an hmang a ni. Mihringin kan hmuh theih chin chu angstrom 4000, rawng dumpâwl tak deuh leh angstrom 7000, rawng senduk inkâr hi a ni ber.
Tin, êng hi a kal chak hle a, Albert Einstein-a phei chuan êng aia chakin thil dang engmah a kal thei lo a ti. Boruak awm lohna hmunah chuan second khat chhungin meter 299,792,458 a kal thei a. Chu chu second khata mêl 186,282 a ni. Boruak awm lohna hmuna êng kal chak zawng hi a symbol chuan c an ti a, constant tihna emaw Latin tawnga celeritas tihna emaw a ni. Thil langtlang thei, entirnân boruak emaw darthlalang emawa a kal chak theih zawng (speed) chu v a ni a. Boruak awm lohnaa a kal chak theih lam nena khaikhinna ratio chu refractive index (n=c/v) an ti leh a. Chutiang anga chhût chuan boruak awm lohna aiin dârthlalangah chuan second khat zelah kilometer sawmkuain a kal tawi zâwk a ni.
2. Tuifinriat, Khawmual leh Van Boruak:
A Ni Hnihna Chu
Pathianin mihring chen nâna khawvel a buatsaih dan hi a ropui a, a ngaihnawm a, a mak a, a ril em em bawk. Chu chu tuifinriat, khawmual leh van boruak a inrem fel dan atang hian a hmuh theih a ni.
Khawvel hmun lia thena hmun thum hi tuiin a chim a. Tuifinriat zâu pui pui mai kâra khawmual lo langte hi tuifinriat zauzia ngaihtuah chuan an zim hle. Khawmualpui kan tihte meuh pawh hi tuifinriat zauzia ngaihtuah chuan thliarkar ang lek a ni. Hei hi a tira Pathian remruat dan a ni chiah em tih erawh chu kan hre lo. Tuilêt hnu hian khawvel hi a chhe hle niin sawi a ni a. Mahse tuman Tuilêt hma kha an hmu bik lo va, rinthu a ni e.
Kan awmna lei hi Pathian chuan boruakin a tuam chhuak vek a. A chhah lam hi kilometer 11 zet a ni a. Amarawhchu boruak han thlen san chin tak tak hi a ramri kham hleih theih a ni lo. Rocket an kah chhuah rawn lêt lehte chuan lei tuamtu boruak hi kilometer 120 vel atangin an hre tan niin an sawi a. Karman Line an tih, kilometer za vela sâng khi lei tuamtu boruak ramria ngaih deuh chu a ni. Chu pawh chu ngaihruatna a ni ber.
Kan lei tuamtu boruak hi a tam ber nitrogen niin boruak za zela 78.09 a ni a. Za zela 20.95 hi oxygen a ni. A dangte chu argon za zelah 0.93, carbon dioxide 0.039 leh a dangte an ni. Hetah hian Pathian themthiamzia a lo lang. Oxygen tel lovin kan nung thei lo va, mahse oxygen hi thil alh duh tak mai a ni a, a hlang chuan hip lût ila kan alh pup pup thei dawn niin an sawi. Nitrogen nen hian mihring ngeih tâwk chauhin a inpawlh a, chuti ni lo se a lova kan awm theih loh boruak chu kan thihpui tur thil a ni.
Kan lei tuamtu boruak chanchin ringawt atang pawh hian ‘I kutchhuak thilsiam tinreng,’ tia Pathian fak hi kan ba hlein a lang. Tin, chu boruak chuan kan lei hi a tuam satliah a ni lo va, lum lutuk tur lak atang te, vawt lutuk tur lakah ten min vêng him a. Chu mai a la ni lo cheu, Ni atanga êng zung hlauhawm tak tak rawn lût tur lak ata min vên bâkah lei piah lam ram atanga van lungthil lian pui pui thlâwk fur fur thin lak ata min vênghim bawk. Boruak hi awm ta lo se chu a khât tâwkin van thengrenga lungpui lian pui pui thlâwk vel chuan min rawn su fo ang a, nuam kan sa hauh lo vang.
Tin, boruak hi awm ta lo se chuan Ni tlâk veleh khua hi aimit thlawn ang maiin a thim nghal bur ang a, a vawt nghal ngawih ngawih bawk ang. Zing vartian pawh a awm lo vang; Ni chhuah veleh a êng nghal uarh ang a, ni sat vanglai ang maiin a sa nghal tlawk tlawk bawk ang. Tin, ri reng reng hriat tur a awm lo vang a, zaithiam leh thiam lo kan thuhmun reng dawn a ni.
Tuifinriat Tunhnai Thu Thar
Kum 2012 June 19 khân Swedish tuichhûng lût thiam, Oceon-X team member-te chuan indopui pakhatna hun laia thlawhna tla an zawnna lamah Baltic tuipui mawngah sâwn thilmak lutuk mai an hmuchhuak ta tlat mai le.
He an thil hmuhchhuah hi Baltic Anomaly an ti a. Anomaly chu thil a nih dan tur pangngai anga awm lo sawina a ni. Chu an thil hmuhchhuah chu an en chian poh leh mak an ti a, sawifiah ngaihna pawh an la hre lo. Sweden leh Finland inkâr tuipui hnuai feet 275-a thûkah chuan thlawhna tumkawng ang mai hian meter 1,500 zet tur hi a inphah zui mai a. Chu tumkawng (tiphawt ila) tâwpah chuan meter 60 zeta chhah hian leilung chu a toh lâwt a, chumi thil toh lâwt chungah chuan lungphêk (lung a nih chiah leh chiah loh pawh hriat a la ni lo va) lian em em mai hi a awm a. Chu lung chungah chuan ngil nalh tak tak hian thil a inziak tlat mai a nih chu.
Tin, he lung tungsawl chunga thil inrin bâkah hian a chung zâwl pan chhohna step niawm tak leh bang niawm tak an hmu a. Tin, a chhûng lam pan chhukna step niawm takte pawh a awm bawk. Chu mai chu a la ni lo cheu, he thilmak deuh mai atanga meter zahnih velah hian Gothic biak in tukverh ang deuh mai hi thil dang a awm bawk a. Chu thil hual vel chuan mihringin an remkhawm niawm tak hian lung 25-30 bâwr vel hi a inrem kual lehzel bawk a. Chu pawh chu finfiah châkawm tak a la ni.
He Baltic Anomaly hi fiah tura a bul hnaia kal a harsa hle niin an sawi bawk. Hei hi a chhan chu a bul meter zahnih bial velah chuan electronic lam thil reng rengin hna a thawk thei lo va, a thi hmiah zel an ti. Thil engemaw tak hian a lo dal tlat mai niin an sawi bawk.
He tuipui chhûnga an thil hmuh hian mak tih a hlawh hle a, thu lêng vâk pawh a tam phah khawp mai. Mi thenkhat chuan Nazi hun lâia indona hmanrua atana an siam a nih an ring a. Thlengthlâwkthei sulhnu a nih ring an awm a, Russia thiam thil nia ringte pawh an awm.
Tuifinriat khu a thûk si, a zâu si, a thim bawk si, a awm dan chiah pawh hi hriat hleih theih a ni lo. Thla-ah khian mi 12 an han tum tawh a, tuifinriat thûk lâi ber Mariana Trench-ah (6,811 feet /2,076 meters) chuan kum 1960-a U.S. Navy Lieutenant Don Walsh leh Jacques Piccard ten an thlen bâk kha tumah an la thleng thla leh lo. Tuifinriat mawng âiin mihringte hian thla leilung leh planet pakhat Mars khi kan hre chiang zâwk a, kan bel chiang zâwk a, sawi tur pawh kan ngah zâwk. Tin, khawvel pâwn lam arsi chanchin zir turin pawisa pawh a lêt engemaw zâtin kan sêng tam zâwk bawk. Tuifinriat tui chhûng lam za zela 99 chu la hriat chian loh a ni.
Tuifinriat hlauhna hian hmanlai phei chuan mihring rilru-ah hmun a luah thûk hle a ni. Tuifinriat chu a zâu va, a thûk bawk si nên hmun hlauhawm zual leh chanchin ngaihnawm tak tak pawh a tam khawp mai. Chung zinga a hlauhawm zual leh mi hriat hlawh deuh deuhte chu han chul ram fan thuak thuak ila.
Tuifinriata hmun hlauhawm ber pakhat chu Burmuda Triangle khu a ni. He triangle hi kilometer maktaduaih khat bial vela zâu, North America leh South America inkâr chhak lam tuipui zâu tak luahtu khua a ni. USA chhim chhak lama khawmual inkhawh lût Florida atanga chhim lam Bermuda thlengin a kal phei a, chuta tang chuan hmar chhak lam hawia lo kir lehin Puerto Rico a han thleng chho leh a. Puerto Rico atang chuan hmâr thlang lam hawia kal zelin Florida a zu pawh leh ta a ni.
Kum 1940 chho khân he lâi hmunah hian mak tak takin lawng leh thlawhna an bo thin a. A bikin kum 1945 December 5-a Avenger bomber panga an bo hnu phei kha chuan miin an ngaihven lehzual a. Pilot-te chuan ‘tui vâr’ chhûngah an lût dâwn mêk tih an sawi hman tawk a, an reh ta vang vang mai a ni. Chung thlawhna zawng tur leh chhan chhuak tura an thlawhna tirh chu a bo ve leh ta zel a. Chu chuan mi ngaihven leh ngaihnawm tih a hlawhtir lehzual bawk. Kum 50 chhûngin lawng leh thlawhna sawmnga dâwn lâi a bo hman a. Amarawhchu kum 1980 chho atang khân a reh ta a ni.
Bermuda triangle-a chhiatna thleng thinte hi a chhan an inrinsiak luih luih a. Thlengthlâwkthei lam mite thiltih a nih ring pâwl an awm a. Rin dan chi hrang hrang a tam khawp mai. Sakhuana lama lo la lût te pawh bang bik lo. Tun hnua miin an pawm tlân deuh tâk ber chu Australia rama Monash University a thawk Joseph Monaghan-a theory hi a ni. Kum 2003 khân Joseph-a chuan scientific ang reng tak mai ngaihdan a rawn vawrh chhuak a. A ngaihdan chu American Journal of Physics-ah “Could Methane Bubbles Sink Ships?” tih thupui hmangin a chhuah a. A sawi dan chuan a experiment atangin methane boruakte hian lawng an tipil thei a ni.
Joseph-a chuan tui hnuai thûk taka methane hlâwm, gas hydrate an tihte chu tuipui chung lamah an rawn phuan chhuak vak thei a. Hmun hnâwng leh thil laihchhuahna hmuna awm thin rim nei lo boruakte chu tuipui mawngah tuifinriat rihna chuan thil sakhat ni thei hial khawpa ritin a delh thei. Vûr khâwn ang maia methane boruak hlâwm chu tuipui chung lama an lo chhuah chuan nasa takin a phuan bulh bulh thei a. Chu chuan lawng leh thlawhnaa electronic hmanraw hnathawh a tibuai thei a ni. Tin, lawngte pawh tui sakhatna (density) a lo hniam thut khân an pil thei bawk.
Bermuda-a thil thleng pakhat, Flying Dutchman an tihfiam thin chu mak tak maia lawngpûte an bo daih thin kha a ni. Hei hi a chhan awm thei chu infrasound vang niin an ngâi bawk. Scientist thenkhat chuan infrasound hi tui chhûng atanga a pâwn lama boruak lo phuan chhuakin a siam thei a. Chung thil phuan ri chuan mihring lûng leh thisen zâmah hlauhna nasa tak a siam a. Chutiang a lo thlen chuan nasa takin mi chu a lo chi-âi vak a. Lawngpûte awm ngaihna hre lo, an thil tawn pumpelh duh chu tuipuiah an zuang lût a ni thei.
He ngaihdan hi a pawmawm ang reng viau a. Amarawhchu eng vanga kum 1980 hnu lama chutiang chu thleng leh ngai ta miah lo nge an nih tih chu tuman an hrilhfiah thiam tawh lawi si lo.
Sargasso Sea
Sargasso tuipui hi Atlantic Tuipui lailia awm a ni a. Tuipui chhûngah tuipui dang a awm tihna a ni ber e. He tuipui hi sana vir zawng hian a vir mup mup mai a. Tuipui hnim chi khat sargasso an tih chu a tam em em mai a. Chu chu tuifâwn chuan a vir pui bawk. He tuipui vir mup mup mai hian dân hran a nei ve tlat mai a. Chu tuipui temperature chu a pâwn lama amah hual veltu tui aiin a sâng zâwk tlat bawk. Chu mai a la ni lo, mit a vai duh viau nge ni, chumi hmuna awm tam tak chuan Ni khi a ruala khawchhak leh khawthlanga lo chhuak angin an hmu fo mai. He tuifâwn hian chung lam boruakah cyclone a siam fo va, chu cyclone kal zel chuan Bermuda triangle chhûnga thlawhna tênâu deuh thlâwk laite chu a titla a nih an ring.
Devil's Sea
He tuipui hi ramhuai tuipui tih mai awm a ni reng e. Tokyo atanga chhim lam kilometer za vel, Miyake thliarkâr bul vela awm a ni a. Mapah zawn chi a ni lo. Lawng mite chuan he lai hmun hi pumpelh hram an duh thin. Thlipuite hi a rawn thawk thut a, chutah mak tak maiin a bâng leh thut thin. Mak tak a ni. Whale te, dolphin leh sava te pawh he lai hmunah hian an awm duh lo niin an sawi. Kum 1950 chho khân kum nga chhûngin lawng pakua a bo hman a. A lar ber chu Japanese research tihna lawng Kaiyo Maru No.5 kha a ni.
Helai tuipui hnuaiah hian tlângkang a awm a. Tuipui mawng lam chu a che deuh reng niin an hria. Tlângkangin a siam thliarkar te hi a rawn lang thut a, a hnu rei lo tê-ah a bo leh daih thin. Tin, helâi velah hian cyclone na fê fê a tleh fo bawk.
Cape of Good Hope
South Africa tuipui kam chhim lam, Cape of Good Hope an tih saw thenkhat chuan Cape of Storms tiin an ko bawk. Saw tuipuiah sâwn thlipui te a tleh thut thut a. Tui lah chu sâng tak tak, meter sawmthum lâia sângten a fâwn hlup hlup a. A han kaltluan laklawh tawh vêk vêk lah chuan mâr pât hian kilometer tam tak tak a fâwn bawk si a. A hlauhawmzia an hrilhfâk thin. Lawng engzât nge he tuipui hian a lo dawlh tawh pawh hriat phâk a ni lo an ti hial a ni.
Hei lo pawh hi Norway hmâr thlang lam tuipui saw an sawi hlauhawm fê bawk. A hmingah pawh Maelstrom livir an ti a. Livir hrâng tak niin an sawi. Ni khatah nasa fê fêin vawihnih a vir chiam thin a. A livir chak dân chu tuifâwn pangngai lêt sawm zet a ni.
Hei lo pawh hi thawnthu ang deuha an sawi hmun hlauhawm tak tak a la awm a. Amarawhchu a thente hi chu a lasi thawnthu deuh a, sawi lan loh pawh a pawi lo vang chu.
Tuifinriat chhûngah khuan rannung eng zât nge awm hriat sên rual a ni lo. Mithiam tam takin an han rin chhin dan chuan khawvela rannung za zela 90 chu tuifinriat chhûnga awm niin an ngâi hial a. Amarawhchu tuilût mi tam tak chuan fit 1,500 velah khuan nunna nei thil che vel hmuh tur awm mang tawh lovin an hria a. Mahse hei hi thil hmuh chian a harsat vang mai a ni an ti.
Tun hnâiah hian thiamna a lo sâng ta a, tunhma lama an tlawh pawh phâk loh tuifinriat hnuaite pawh an zu hmu pha tan ta. A thim em avang leh tui rihna a nasat tawh lutuk avanga nunna nei thil engmah a awm theih pawha an rin lohna hmunah rannung mak tak tak an hmuchhuak thar a. Chung an hmuh chhuah pakhat chu changpât lianpui, fit riat zeta sei, a ruala awm chi an ni a, eng tin nge mêl hnih mêl thuma thûk tuifinriatah chuan an dam khawchhuah theih hriat a ni lo.
Tuifinriat chhûng hi mihringte hian kan la hre tlêm em em a, thiamna sâng zelin tlêm tlêma a hriat belh hi kan nghâk ngawt mai lo thei ta lo a ni. Tuifinriat chhûnga Pathian themthiamzia inphûm kuh tûn mai khu chiang zâwka hriat chu châkawm tak a ni.
3. Hnim, Thlai leh Thingte: A Ni Thumna
Khawvel chu tuifinriat leh khawmualah a inthen fel ta. Mahse a la ruak huai mai. A ni thum ni chuan Pathianin khawvel chu thing chi hrang hrang nuaih têl bâkah hnim leh thlai chi hrang hrangin a tikhat a. Heng khawvel tuamtu hnim leh thingte hi ruahmanna fel tak leh fing tak hnuaia lo piang an ni tih chu an awm dan en hian hnial rual a ni lo (keinin mawlmang taka ‘hnial rual a ni lo,’ kan han tih ve phawng phawng ang hi mithiamte chuan hnialna an lo nei tha leh fê thin).
Sâpho pek chuan thing (tree) kan tih chin chu a kung, âwm chen vela teha cm 10 hawlhtlang chin hi an tideuh bik a. A bâk zawng chu hnim (shrubs) zingah an telh a ni. Thing hi chi hrang hrang nuaih khat lâi awmin an sawi a. Amarawhchu ram lum ruahtui tamna hmuna ngaw chhah pui puite hi tlawh pawh mang loh a la tam a, chuvangin thing chi engzât nge khawvelah hian awm a hriat dik tak tak theih loh. An tangkaizia sawi tur tam tak a awm naa tlêm tê chauh han sawi ila. Lei kal ral tur an vêng a, mihring tâna thil pawimawh ber tihngam tur oxygen an siam a, atmosphere-a carbon dioxide tam lutuk an vên mai bakah lei chunglâng temperature an vawng dai bawk.
Thingte hi eng chena sângin nge an than theih tih hi inhnial theih tak a ni. A teh dik pawh a harsa hle. Tunlaia an teh dan ber pakhat chu laser rangefinder an tih, laser hmanga teh a ni a. A pakhat leh chu han lawn chilh a, a ler atang hrui thlâk tawp chi hi a ni. Mahse hei hi tehsual a awl bâkah a tehtu tam takin an teh sâng hret thin nia hriat a nih avangin rintlâkah an ngâi ta meuh lo. Engpawhnise teh dan hrang hrang atanga an lâka tunlai thing sâng deuh deuh nia an hriatte chu han tarlang ila.
Coast Redwood (Sequoia sempervirens): 115.66 m (379.46 ft), Hyperion, Redwood National Park, California, United States
Coast Douglas-fir (Pseudotsuga menziesii): 99.76 m (327.3 ft), Brummit Creek, Coos County, Oregon, United States.
Australian Mountain Ash (Eucalyptus regnans): 99.6 m (327 ft), Hobart chhim lam, Tasmania, Australia
Sitka Spruce (Picea sitchensis): 96.7 m (317 ft), Prairie Creek Redwoods State Park, California, United States
Giant Sequoia (Sequoiadendron giganteum): 95.8 m (314 ft), Sequoia National Forest, California, United States
Tasmanian Blue Gum (Eucalyptus globulus): 90.7 m (298 ft), Tasmania, Australia
Manna Gum (Eucalyptus viminalis): 89 m (292 ft), Evercreech Forest Reserve, Tasmania, Australia
Shorea faguetiana: 88.3 m (290 ft) Tawau Hills National Park, Borneo thliarkâra Sabah hmun a mi.
Alpine Ash (Eucalyptus delegatensis): 87.9 m (288 ft), Tasmania, Australia.
Heng thingte hi an sâng hlawm thiau thiau khawp mai. Mizoramah chuan a han el pha an awm meuh awm lo ve. Ka thing hmuh sân ber chu Thingsulthliah daia kan leipui lû ami Thingdawl a ni. Feet eng zât nge kan teh thei ve lo va, sâng zawng kan tive ngiang mai.
Heng thing lian pui pui hnuaiah hian hnim chi hrang hrang nuaih têl tak meuh meuh an awm leh bawk a. Heng hnimte hi khawvel timâwitu leh tinuamtu, kan eitur min tumsaktu an ni satliah lo va, boruak nuam tak min siamsaktu leh kan boruak hip tur oxygen min supply-tu tha tak an ni.
Tin, Pathian chuan khawmualah chauh hian hnim chi hrang hrang a dah lo va, tuifinriat chhûngahte tak pawh khuan hnim chi hrang hrang a lo tam mai. Chung tui chhûng hnimin oxygen a siam chhuahte chu khawmuala thing leh mâuten oxygen an siam aiin a tam zâwk ngial awm e. Tuifinriat chhûnga hnim awmte hi a thente chu mâwi tak takte an ni hlawm a. Khawmuala thing lian pui pui ang erawh chu a awm ve lo a ni ang. Thing leh mâu, hnim leh pangpâr mawi tak takte hi han en ila Siamtu ropuizia leh A hmangaihna nasat turzia hi a lang chiang hle a ni.
4. Ni, Thla leh Arsite: A Ni Lina Chu
Pathian thilsiam zinga chanchin nei ngaihnawm ber pâwl leh scientist-te tiluhaitu ber pakhat chu Ni, Thla leh arsite chungchang hi a ni hial awm e. Kei pawhin lei leh van (universe) ka ngaihtuah hian ât mai pawh awl dâwn zâwkin zu hre ve hiala maw le. A han sawi tan dan pawh thiam har tak a ni.
Ni (Sun) Pui Roh Khi
Ni khi kan lei atangin mêl maktaduaih hlir 93 a hlâ-ah a awm a. Patling nilêng ban han tih satliah mai âi chuan hla tak a ni. Tin, Ni khi a hmunah chuan boruak zang ber chi hydrogen insawh muk mai a nih avangin kan leilung anga sak leh chang rum rût ang hi a ni lo va, a sat em avangin ni thei pawh a ni lo. A taksa pawn lam khi 6,000 C vela sâ a ni a, a chhûng lam phei chu 16,000,000 C zeta sâ a ni e an tih chu. Chutiang khawpa sâ chu han sawi uar vak ngaihna pawh ka hre lo zâwk. New Delhi-ah khuan chutianga sâ meiling kuttum tiat vel chu awm ta se Aizawl atang hian a la sâ viau ang. Chutiang taka thil sâ chuan atom te pawh a ek phel thei a, chuvangin Ni-ah khi chuan khawvelin kan hlauh em em hydrogen bomb chu englâi pawh hian (second tinin) metric ton maktaduaih 620 zet hi a puak ul ul reng mai a ni.
Chutiang tak chuan Ni chu eng chen nge a lo alh tawh hriat phâk a ni lo va, eng chen nge a la daih dâwn pawh kan hre pha lo. A hydrogen pai khian daih loh chin a la nei ngei dâwn tih chu scientist-te rin dan a ni a. Mahse chu chu a la hla deuh; kum tluklehdingawn nga vel la ni turah an ngai a ni. Tin, Ni khi a lian hle a, hawlh tlangin km 1,392,000 a ni a. Chu chu kan lei hawlh tlang lêt 109 a nih chu. Kan chenna khawvel lêt 330,000 a lian a ni. A rawng khi a vâr a ni a, lei atang hian a eng (yellow) angin kan hmu a, chu chu van rawng khi a dumpâwl anga lei atanga a lan vang a ni.
Tunhma deuh kha chuan Ni khi a awmna galaxy, Milky Away-a arsi dang awm zingah a tê pâwl niin an sawi thin a. Mahse chutiang em ema nikhua lo chu a lo ni bik lo; a awmna galaxy-a arsi za zela 85-te chu a âia êng lo zâwk an ni an ti leh tawh. Kan sawi tâk ang khan mei alh hlawm a nih avangin thlipui a thaw hum hum reng a, a alhte chu van sângah khawvel tiat tiat tur hi an thlâwk duai duai fo bawk.
Ni Heltute Planet-te
Ni khian heltu planet pariat (tun hma kha chuan Pluto nen pakua kan tih thin kha) a nei a. A hnaih bertu Mercury-in mêl maktaduaih 57.6 atangin a hel a. A hlat bertu Pluto (la tihram teh phawt ang) chuan km 5,913,520,000 (39.5 AU) atangin a hel thung.
Pluto sawi tâkah chuan inhnialna a chawh chhuah zin em avangin han chhunzawm thui hret ila a tha awm e. Amah khi hawlh tlangin km 2274 a lian a ni a. Thla (Moon) âi khian a tê hret a nih chu. Chutiang khawpa tê chuan heltu thla pali a nei ve tlat mai nia. Chungte chu kum 1978-a hmuhchhuah Charon te, kum 2005-a hmuhchhuah Nix leh Hydra te, kum 2011 July 20-a hmuhchhuah, hming mumal la pêk loh S/2011 P 1 te hi an ni. Mahse a heltute hi an tê hle a, entlang tha mi pawhin hmuh mai mai theih an ni lo.
Pluto hi kum 1930 khan an hmuchhuak chauh a. A têt deuh avangin planet zinga chhiar tel tur nge ni chhiar tel loh tur tihah mithiamte an inhnial nghal a. Eng tin tin emaw ni planet zingah chhiar tel a ni hram a ni.(Tunah chuan an telh leh tawh lo) Tin, a hming turah pawh hian an buai hle bawk. A hming phuah theihna right neitu Lowell Observatory chuan rawtna sangkhat zet a dawng a. A hmuchhuaktute zinga mi Clyde Tombaugh-a chuan an director Vesto Melvin Slipher-a chu miin an phuah hmaa phuah vat turin a râwn a. Lowell-a nupui Constance Lowell-i chuan Zeus tih a rawt a. A hnu lawkah Percival ni se a ti a. Chumi hnu-ah Constance ni se an ti leh a. Heng rawtnate hi a tlang lo. A hnu lawkah England rama Oxford khaw hmeichhe naupang Venetia Burney-i (1918-2009) rawt angin an planet hmuhchhuah thar chu Pluto an ti ta a ni.
Pluto hming an phuah dawn hian rawtna dang, Minerva, Cronus tihte nen an pathum hian bûk a ni a. Pluto tih hian vote zawng zawng a hmu a. Lawmmanah Burney-i hian pound nga a dawng a. Hei hi March 24, 1930 a ni. Tun hnu deuh hian Pluto zir chiang tur thlalem han tirh chhoh hi an sawi fo tawh a, mahse a hlawhtling mai thei lo. Kum 2003 khan rei tak sawiho a nih hnu-ah US sawrkar chuan Pluto zir chiang tur thlalem siam nan pawisa a dah hrang ta a. Tichuan mithiamten an han bawhzui char char a, kum 2006 January 26 khan Pluto han zir chiang thei tur thlalem New Horizon chu hlawhtling takin an kâp chhuak ta a. Tum anga a kal tluan zel theih chuan kum 2015 January 19-ah Pluto chu a han thleng dawn a ni (Heta thleng kan tih hi a han tum dawn tihna a ni lo, a han hnaih lai ber sawina mai a ni). He thlalemah hian a hmuchhuaktute zinga phusa ber Clyde Tombaugh-a vâp an dah nghe nghe.
Pluto hi a vawt hle a, a lum lai ber pawhin -230 C a ni hem mai. Aizawlah chuan +5 C a nih pawhin vâwt kan titawh hle a ni. Kum 75 zet chu Pluto hi ni heltu planet pakuana anga chhiar a ni thin a. Mahse a têt em avang te, amah tiat deuh ruau ruau, han cho pha ve mai tur chi an hmuhchhuah tâk fo avang leh thil dang dang avangin kum 2006 September 13 khan International Astronomical Union (IAU) chuan planet a nihna atangin an paih a, planet tê dwarf planet zingah an telh ta a ni. Pluto piah lam hla fê-ah sâwn Ni heltu dwarf planet an la awm nual a, chungte chu a hlat dan indawtin Haumea, Makemake leh Eris te an ni. Haumea hi artui ang deuha tung sawl a ni a, heltu thla pahnih a nei. Kum 2005-a an hmuhchhuah Eris hi Pluto nen hian a intiat thuak a. Amah heltu thla pakhat Dysnomia a nei ve a. Planet zinga chhiar tel an tum deuh uaih uaih thin.
Ni heltu planet-te chu Mercury, Venus, Earth, Mars, Jupiter, Saturn, Uranus leh Neptune te an ni. Mars leh Jupiter inkarah khian vaivut nawi atanga lung lian pui pui, kilometer za chuang chuang hawlhtlang chu Ni helin a maktaduaih têl an thlawk vir mup mup bawk a. Chung zinga lian ber chu a lai hawlhtlanga kilometer sangkhat bâwr vel Ceres an tih chu a ni. Tin, Neptune piah lamah sâwn Kuiper Belt an tih a awm a, chutah pawh chuan van lungnawi maktaduaih têl Ni helin an vir mup mup bawk.
Planet zinga Ni hnaih ber Mercury chu Ni atanga kilometer maktaduaih 57.6 a hla a ni a. Ni a hnaih avangin a sa hle a, a ro vawng vawng ringawt mai a ni. A dawttu Venus chu Ni atangin kilometer maktaduaih 107 a hla niin planet zingah a sa ber. Chhûmin a tuam tlat avangin a taksaa lumna kal ral tur kha a chhuak thei lo va, a inup sa ta em em mai a nih chu.
A pathumna chu kan chenna khawvel hi a ni a. Sawi tam a ngai awm lo ve. A palina chu Mars khi a ni a. Ni atanga kilometer maktaduaih 225.6 a ni. Khawvel ai hian a tê hret a. A hlat tawh deuh avangin a vâwt tawh khawp mai. Hêltu thla pahnih Phobos leh Demos a nei ve.
A pangana chu Jupiter a ni a, Ni atangin kilometer maktaduaih 772.8 zet a ni tawh. Kan chenna khawvel ai hian a lêt engemaw zâtin a lian a. Heltu thla pawh 63 zet a nei. Amah khi khawvel anga sakhat a ni lo va, boruak inhlawmkhawm a ni ber. Han tum ila chu kan pil thawih thawih dawn a ni. A chhûngah hian planet dang zawng zawngte hi an leng vek bawk.
A parukna chu Saturn a ni a, kilometer maktaduaih 1417.6 zeta hlâ a ni tawh. Saturn hian heltu thla 62 zet a nei ve bawk. Thla mang sawi tur a nei ve dawn lo tihna a nih chu. Heng a thla zinga 53 te chuan hming an nei. Saturn heltu thlate hi a tam zâwk chu an tê hle; an zinga 34 te chu kilometer sawm hnuai lam hawlhtlang chauh an ni a, a dang 14 te chu kilometer 50 hnuai lam hawlhtlang an ni. Amah hi tui aiin a sakhat lo zâwk a, chuvangin tuifinriatah hian rawn tum thei se chu a lâng nul nul dawn tihna a ni.
Saturn hian zungbun ang deuha hualtu ring a nei a. Chu chu a hmingthan phah hle. Amah hual veltu ring te chu an inthuah tup mai a. Entlang tha deuh hmanga en chuan a lang thei an ti. Amah hi mit lawnga hmuh theih planet hla ber a ni bawk.
Ni heltu planet hlat dan indawta a pasarihna Uranus khi Ni atanga kilometer maktaduaih 2852.8 zet a ni a. Heta tang hi chuan Ni pawh khi lang tê vau vau tawh tak a ni. Heltu thla 27 a nei ve a. Sawi thama lian an ni lo thung.
Planet zinga hla ber Neptune khi Ni atangin kilometer maktaduaih 4,497 zeta hlâ a ni tawh a. Ni pawh arsi lian deuh ang chauhin a lang tawh a ni. Ni lum ai tur pawh a awm tawh lo; a vâwt lutuk tawh a, rizai thuah sawm pawh sin ila Neptune-ah hi chuan awmzia a awm tawh lo vang. A vawh dan tlangpui chu −221.4 °C a ni. Tin, Neptune hi planet zingah chhiarkawp hmanga an chawh chhuah hmasak ber a ni bawk.
Live Science chanchinbu May 27, 2012 (as qouted by Competition Success Review YEAR BOOK 2013) in a chhuah dan chuan Brazil arsi lam zir mite chuan Pluto piah hla tâwk fê-ah sâwn kan lei let li vela lian planet dang an hmuchhuak a. A chanchin erawhchu an la hre chiang vak lo a ni awm e. Hei hi tak tak a nih chuan planet-ah chhiar tham a ni ngei ang. A hla tawh viau dâwn a, a vâwt tawh viau turah ngai bawk ila.
Heng Ni heltu planet inhlat dan leh inhip tawn dan hi a tâwk tea Pathian ruat an nih avangin khawvelah hian mihringte hi kan khawsa thei chauh a lo ni.
Vana Arsite
Ni khi arsi vantlâng a ni a, a lenzia pawh khawvel lêt nuaihthum chuang a ni kan tih tawh kha. Tin, Ni khi arsi bâwmpui galaxy pakhat, Milky Away, Mizovin Thlasik Kawng kan tiha awm a ni. A awmna galaxy-ah hian a tiatpui leh a âia lian arsi tluklehdingawn 200 zet awma sawi a ni a. Chung arsite chuan Ni ang bawk khian heltu planet nei ve ta se scientist-te sawi danin Thlasik Kawngah ringawt pawh hian mihringte chen theihna planet dang tluklehdingawn têl a awm thei a nih chu!
Ni khi Thlasik Kawng laibu (centre) atanga êng kum 25,000 – 28,000 inkâr bâwr vel, Orion Arm an tiha awm a ni. A awmna hmuna awm reng lovin Ni chuan Thlasik Kawng laibu chu second khata kilometer 251-a chakin a hel vut vut a. Hemi speed –a thlawk vut vut chung hian kan Ni leh a heltu planet pariatte hian eng kum khat (light year) zin turin kum 1,190 zet a duh a ni.
Tuna mihringin universe kan zir phâk leh kan hmuh phâk chu êng kum tlûklehdingawn 92 bial (46 radius-in) a ni a. Hemi chinah ringawt pawh hian arsi bâwmpui galaxy tluklehdingawn za zet awmin an ring a ni. Galaxy-te hi an inlen hleih ve hle. Hawlh tlanga êng kum 30,000 te an ni a, kan awmna galaxy Thlasik Kawng hi a lai hawlh tlanga êng kum 100,000 a ni. Galaxy thenkhatah chuan arsi maktaduaih sawm bawr vel chauh te an awm laiin a lian pâwlah chuan arsi maktaduaih hlir maktaduaih (1,000,000,000,000) an awm thei. Kum 2010-a arsi lam zir miten an hisap danin tuna mihringin universe kan zir phâk chinah hian arsi sextillion zathum (300,000,000,000,000,000,000,000,000,000,000,000,000) awm hialin an ngâi a. Tin, galaxy-te hi an inhlat hlawm hle; min hnaih bertu Andromeda khi êng kum maktaduaih 2.5 a hla a ni a. Kan lam pan hian a rawn thlâwk duai duai a. Tun atanga kum tluklehdingawn 3.75-ah khian kan awmna galaxy nen hian an insu dâwn a ni.
SCIENCE chanchinbu (January 12, 2012) chhuah danin scientist-te chuan Chile rama NASA entlang tha Chandra X-ray Observatory leh Atacama Cosmology Telescope atangin êng kum tlûklehdingawn sarih vela hla-ah sâwn arsi bâwm galaxy awm khâwmna cluster ropui em em mai an hmuchhuak a. An thil hmuhchhuah hi Astrophysical Journal-ah an chhuah bâkah American Astronomical Society meeting-ah an present bawk. He an thil hmuhchhuah hi a hmingah Spanish tawnga ‘thâu’ sawina El Gordo an vuah a. A lenzia chu kan awmna Thlasik Kawng tia thiau arsi bâwm 20,000 ang tiat vel a ni. A hmuchhuaktute zinga mi astrophysicist Felipe Menanteau-a sawi dan chuan he cluster-ah hian Thlasik Kawng tiat vel galaxy sâng têl tak meuh meuh a awm a. An zinga thenkhat chuan kan lei ang deuh planet-te pawh an nei ve maithei a ni an ti.
Heng van arsi chhiar sen loh let engemaw zata tamte hi khawvel siam laia siam an nih ve chu a rinawm chiah loh; he khawvel ngau ngau pawh hi eng chena rei nge a lo awm tawh tih a hriat si loh a. Sawi fiah zawh rual a ni lo ve.
Vana arsi chhiar sên lohte khi han ngaihtuah chiang chet chet ila a mak a, a ât chhawlh theih a ni. Heng thilsiam ropui tak tak leh mak tak takte hian Pathian ropuizia chu an puang a. Chu zawng aia mak leh ropui zâwk chu heng zawng zawng Siamtuin inngaitlâwm taka Bethlehem ran in a rawn bel thei kha a ni. Vantirhkohte chuan mak an ti a, Setana pawhin tihngaihna a hre lo. Keini tlansate tân erawh lawmna chuai thei lo min petu a ni.
5. Tuifinriat Nungchate leh Savate: A Ni Ngana Chu
Pathian chuan ni li chhûnga a thilsiamte chu tha a la tihle vek a. Tunah chuan rannung leh savate chên nân khawvel chu a inpeih ta. Tuifinriatah chuan sangha ei duh zawng hnim chhiar sên loh a awm tawh a. Khawmual lah chu ngaw dur pui pui leh phaizâwl phûl hmun hring mâwi tak takin a khuh bawk a. Tuikhawthla mâwi tak tak te, pangpâr mâwi tak tak leh tlâng pâwng nalh tak takte chu nunna nei dangte luah loh atan chuan an uihawm lutuk a ni.
A hmasain Pathian chuan tuifinriata cheng chi sanghate leh nungcha dang reng reng chu a hmaa a lo duan lâwk tawh angin ‘Awm rawh se,” a ti a. Chu veleh tuifinriat chu sangha te reuh tê tê, ngha-meidum tih angreng leh sangha lian pui pui shark leh whale ten an khat nghal a. Anmahni chi ang theuh zela awmin tuifinriat chu an luah khat ta mup mai a ni.
Whale hi sangha anga sawi leh chhiar a ni naa hnute tuia no chawm chi a nih avangin ransa (mammal) zingah chhiar tel a ni. Khawvela rannung lian ber a ni a, a chuap ringawt pawh Santro car tia lawih a ni thei. Whale zingah rau rau pawh blue whale ho hi an lian ber a, fit 108 a sei, ton 190 (USA-ah chuan ton khat hi kg 907.18 a ni) a rit te an ni hawlh hlawm. An hmanhmawh deuh châng chuan dârkâr khatah mêl 30 a chakin tui an hleuh thei a, hun pangngaiah chuan dârkâr khatah mêl 12 vel an hleuh tlângpui. An naute pawh chawm an hautak khawp mai; ni khatah hnutê gallon 100 atanga 150 te an hne thei a ni. Tin, an lêi hi a sei hle a, blue whale puitling lêi chu sâi chen zet a ni thei.
Blue Whale-te hi a ruala hmuh tur an vâng hle. A inkawpa awm chu hmuh tur an awm fo va, chu pawh chu nufa an ni duh khawp mai. An chaw tamna hmunah erawh chuan a rualin tam tak an awm ve fo thung. Tui chhûngah minute sawmhnih emaw chauh an awm theih avangin boruak hip tura an zuan chhuah fo a ngâi a. Chuvangin hmuh pawh an awl phah hle. Tin, chaw an ei tam thei khawp mai. An duhzawng tak an hmuh chuan ni khatah quintal 40 dawn te pawh an ei thei a ni.
Hetiang tak hian sangha thenkhat chu lian mah se Pathian siam ve tho sangha thenkhat, entirnân Indonesia rama an hmuhchhuah thar Paedocypris an tih te chu centimeter khat em pawh tling lo, a sei berah millimeter 7.9 chauh a ni.
Sangha Hlauhawm
1.Great White Shark
He shark hi shark zingah rau rau chuan a lian ber a, khawvel tuipuiah hi chuan an awm vek a, vaukam hnaih lamah an cheng deuh ber. Meter ruk (fit 20) vel zeta sei, ton ruk zeta rit a ni thei bawk. Sangha zinga sangha dang leh rannung dang ei chi zingah chuan a lian ber a ni. A tlângpuiin vanduai hle loh chuan hetiang sangha hian mihring a bei meuh lo. Thil a seh tam tak chu eng nge an nih hriat tuma a seh chhin an ni a. Mihring a sehte pawh hi eng nge an nih en chhin nana a sehte an ni deuh ber.
2. Box Jellyfish
He sangha (sangha kan tive mai pawh a, sangha ang tak tak chu a ni lo) hi a bial a ni a, mei ang deuh sei fê fê, fit 15 zeta sei sawmruk lâi a nei a. A meiah chuan tûr hlauhawm tak, patling sawmnga zet tihlum thei tur a awm zel bawk a. He sangha avang hian mi an thi zauh zauh tawh a ni. Australia, Phillipines leh tropic ram tuipuiah te an awm deuh ber.
Tuifinriat chhûng hi kan la hre tlêm hle. Tui thûk chin tak tak phei chu mihringte hian kan la zu pawh thei lo va, chuvangin eng tiang chiah ropui leh mak nge a nih pawh hi hriat theih tak tak a ni lo. A zir mite erawh chuan an zir phâk china nunna awm leh chung nunna nei sangha leh rannung chi hrang hrangte chu an hmuhin a ropuizia an hrilhfâk a ni. Tuifinriat mawng thim mup maiah khuan rannung mak tak tak awm ngeiin an hria a. Chakâi mit nei lo maktaduaih têl vâk dul dul te, rannung mak tak tak, sangha pawh ni lo, eng ransa zingah mah chhiar telh remchang mai lo leh hming han phuah mai hleih theih lohte pawh an awm teuh awm e.
Khawmualah pawh hmuhnawm tham nungcha tinrengte chu Pathianin a dah a. Ransa lian pui pui sâi atanga fanghmir thlengin anmahni chi awm dan theuhin Pathian chuan a dah a. Heng rannungte hi a hranpaa zir fê tham vek an ni. Fanghmir ringawt pawh hi chi hrang hrang 12,000 chuang a awm. Khawvel hmun tin an luah tih theih a ni. Antartica, Greenland leh thliarkar tlêm tê tih lohah chuan fanghmirte hi khawi hmunah pawh an awm tihtur a ni. Fanghmir finzia leh themthiamzia chu hahipa sawi tham a awm. A ruala awm chi an ni a. South America-a Army Ant (Ecitron Burchelli) an tihte chu bu khatah 700,000 te an awm thei. Scientist-te sawi danin khawvela fanghmir zawng zawng leh mihring zawng zawng hi kan inbûk tâwk vel a ni awm e. Awih chu a harsa deuh; mahse ‘Ka hria alawm’ ti theiin an sawi tlat mai a, hnial buai lo teh ang. Khawvela fanghmir zawng zawng hi mihringte hian insem ila maktaduaih 1.5 theuhin kan chang dâwn a ni an ti. Amazon luiruam ngaw kârah phei khu chuan an han sawi tam khawp a, acre khatah fanghmir maktaduaih 3.5 vel awm zel ang a ni an tih lehpek chu! In (bu) lah chu an han nei sei thei khawp a. California-a fanghmir bu pakhat an hmuh chu mêl zaruk zeta sei a ni an ti. Fanghmirte hi an dam rei lo hle, kan hmuh tam zâwk, hnathawktute hi ni 40-45 vel an dam a. A lalnu erawh chu kum 20-30 a dam thei. An lalnu a thih hnu hi chuan thla tam an daih tawh lo; an rêm deuh zel a ni.
Savaten chaw an zawn thiamzia leh bu an chheh thiamzia pawh sawi tam a ngâi lo ve. An thla insiam dan ringawt pawh hi lu tihai tham zeta changkang leh mak a ni a. Tin, khawvelah hian sava damlai tluklehdingawn khat atanga tluklehdingawn hnih inkâr vel awma ngaih a ni.
International Union for Conservation of Nature-ho sawi danin tun dinhmunah hian sava chi hrang hrang 9,865 la awma hriat a ni a. Chung zinga 1,227 te chu an mang mai hlauhawm khawpin an tlêm tawh a. A bikin an zinga 838 te phei chu an ral lo chauh a ni. A dang 7,735 te chu la hlauhthawm loha ngaih an ni a, 65 te chu an dinhmun la sawi mai theih loh an ni thung. Kum AD1500 atang khan sava chi 133 zet an mang tawh nia hriat a ni a. Tin, sava chi lite chu sahuanah chauh hmuh tur an awm tawh bawk.
Khawvela sava lian ber chu Ostrich a ni a. An rihzawng pawh pound 220 atanga 350 thleng niin fit 7-9 velin an sâng thei. Ostrich-te hi an tlan chak hle a, dârkâr khatah mêl kilometer 70 vela chakin dârkâr chanve vel an tlan thei a ni.
Khawvela sava tê ber vethung chu Bee Humming bird a ni a. Inches hnih a chuang awrh a ni. A thlawh lâiin he sava tê hi minute khatah vawi 300-500 inkâr vel a thaw hman a. A lungphû pawh minute khatah vawi 30 atanga vawi 1,500 inkâr a ni thei; a chêt hah dan azir a ni. Humming bird hi sava zingah a hnung tawlh zawng te, a letling zâwng te leh a sir zâwng tea thlâwk tawn vel thei awm chhun a ni bawk.
Sava thenkhat chu chhim tâwp leh hmar tâwp kar tawnin an pêm kual thin a. Hmanraw engmah hmang si lo mêl sang tam tak kawng bo miah lova an pêm kual thei hi mithiamte mak tih ber pakhat a ni.
Tichuan heng Pathian thilsiam mawi tak takte hian leilung chu an luah khat ta a. A tira Pathian siam dan tak kha kan hmu ve lo va, engtiang taka mâwi leh nuam ni ang maw?
6. Ransa, Rannung leh Mihring: A Ni Rukna Chu
Ni rukna zing khua a lo vâr a, Ni a chhuak ta. Khawvel chu thing leh mâu, pangpâr mawi tak tak leh phûl hnim hring mâwi em em maiin a khuh chhuak vek a. A mawizia chu suala tlu tawh mihringte hian kan suangtuah phâk awm lo ve. Chumi ni chuan Pathianin khawvel chu a han en a, thil kim lo a la awm tih pawh a hre chiang kher mai. Chutah a thiltihtheihna chhui sên rual loh hmang chuan ransa tinreng mai chu a han siam leh ta a. Chawhnu tlâng a han her meuh chuan khawvel chu ransa mâwi tak tak leh inang lo tak takin an khat leh ta hmur mai. Ransa thenkhat chu lian pui pui an nih laiin thenkhat chu te tâk tê tê an ni a. Mahse a tua mah chu an indip lo; Pathianin an awm dan tura a ruat ang chiahin an awm a ni.
Tunah hian khawvelah ransa chi hrang hrang maktaduaih khat vel awmin an hria a. Hei hi Pathianin khawvel a siam tirh âi kha chuan an tlêm zâwk daihin a rinawm. Engpawhnise maktaduaih khat pawh hi tam tak a ni. Rûl ringawt pawh hi chi sangruk vel awmin an hria a, kum tin a chi thar an la hmuchhuak lehnghal. Maimawm ringawt pawh hi chi hrang hrang 7,000 zet awmin an sawi nia! Chu mai a la ni lo, hrikhrah ringawt pawh hi chi hrang hrang 3,000 zet a awm an tih chu! Khawvelah hian bawng tluklehdingawn khat vel a awm a, chung zinga maktaduaih 200 chu India ram ami a ni.
Utawk thlawk thei an tih, flying frog te hian ni khat chhungin an vun rawng an thlâk fo thei. Chhun Ni sat lai chuan a hring pâwl angin a lang a. Tlai lamah a hring a, zanah a dum thung. Boas rûlte hian an lû-ah thil lum hre thei em em mai taksa pêng khat pit tih chu an nei a. An bul hnaia thisen lum chi ransa dingte chu an hre thei a ni.
Ransa zingah mihring tana tangkai tak tak, bâwng, beram, kel, ui, vawk, âr, sakawr, sabengtung te an awm a. Hengho hi mihringin kan vulh a, an tangkaizia hi chu sawi lo mai ila. Tin, thenkhat sawi danin mihringte hian kum 4,000 kal ta atang khan rannung vulh thar kan nei miah lo an ti. Tuna kan ranvulhho hi kum 4,000 kal ta khan mihringin an lo vulh vek tawh a ni. Engpawhnise an tangkaina lam chu kan hriat sa a nih avangin rannung zinga a hlauhawm lam i han sawi zâwk teh ang.
8. Poison Dart Frog
Hetiang utawk hian amah beitute lo beih lêt nan a hnungzângah hian tûr chak tak mai, patling sawmin an thih pui theih tur a nei a. Mahse vanneihthlâk takin mihringin kan man hian a tûr chu zu chhuah ngai miah lo va. Hetiang utawk hi South America-ah an cheng ber.
7. Africa Ram Lâwi
Heng lâwi chi hi ton 1.5 a rit, meter 1.7 a sâng, meter 2.8 a sei an ni thei. An thin tihrim chuan an ki hriam fahran mai hmangin mi a bei thut a, an hmêl en aiin an che rang bawk si a, hlauhawm tak an ni. Kum tin mi engemaw zât a si hlum thin a. Africa-ah chuan ransa dangin mihring an tihhlum belhkhawm aiin hetiang lâwiin mihring a sik hlum hi an tam zâwk an ti.
6. Savawm Vâr
Hetiang savawm chi hian mihring a bei mai mai lo naa a tawh fuh vêk chuan a vawikhat benah mihring lû te hi chu a tin hmangin a chhawk zawk zawk thei. Hmâr tawp vûr rama awm a ni a, elephant seal te, walrus te, whale te, rheindeer te leh savawm dang te pawh a ei thei vek a ni.
5. Sâi
African Sâite khu hetia en ai hian an kawlh daih mai a. Kum tin mihring 500 bâwr vel an tihlum ziah ang a ni.
4. Awle
Awle thenkhat Saltwater Crocodile an tihte hi awle chi-ah chuan an lian ber a, fit 15 atanga 21 thleng te pawh an ni thei. Australia hmar lamah leh Southeast Asia-ah an awm deuh ber. Ransa lian tak takte pawh a ei fo. Ransa a seh chuan a vir pui chiam thin a, chu chu an dawl lo tlangpui bawk. Tui chhûngah chuan dolphin sangha anga chakin a che vel thei a ni..
3. African Sakeibaknei
Africa ram pakhat, Tanzania-ah chuan kum tin sakeibakneiin mi za vel sehhlum ang a ni an ti. Sakeibaknei hi ramsa zingah a lalber an ti thin a. A huai a, a sual a chhuah chuan hlauhawm tak a ni.
2. Asia Khawmualpui Chawngkawr
Asia khawmualpuia awm lo atan a tha mawle. He chawngkawr hi khawvela rûl tûr nei tha ber ni lo mah se a hmang ngun ber thung a. Chuvangin a hlauhawm khawp mai. Kum tin rûl chuk avangin mi 50,000 vel an thi ziah a. Chawngkawr hian a thawh hlâwk khawp mai.
1. Thosi
Thosi seh avangin kum tin mi maktaduaih hnih vel an thi ziah a. Kum tin mi maktaduaih 70 hnenah Sikserh natna an theh darh ziah bawk. Rannung âwm nêm tê si, anmahni avanga thi hi khawvelah an tam em em reng mai. Chuvangin TV Channel lar tak Animal Planet chuan rannung zinga hlauhawm berah a puang a ni.
Pathianin ransa a siamte chu anmahni chi ang theuh zela awm turin a siam a, chuvangin sakei leh sakawr an inthlah pawlh thei lo va, bawngin beram a hring thei hek lo. Hetianga nghet taka mahni chi ang theuha an awm hi a hlû a, a mak a, a ropui em em a ni. Sakei leh sakhi te hi inthlah pawlh thei ta se khawvel hi a buai zo vek ang. Zâwngin sakei thlah se a thlah ve lo a bula zâwng dangte nen an khawsa ho thei dawn lo va, nature hi a buai zo vek dâwn a ni. Mihringte hian savawmte hi hring ta daih mai ila mihring dangte nena kan khawsak hona a buai vek ang a, khawvel hi a mumal thei hauh dawn lo a nih chu.
Tin, ransa zinga a nu leh pa an awm lehzel hi a mak hle bawk. Evolutionist-hovin eng tin nge heng thute hi an hrilhfiah ka hre lo va. He thuziak hi evolution leh creationism bûkna tura ziak a nih loh avangin kan sawi thui lo vang. Zêp lohah chuan sawi thui chu châkawm tak a ni. A nu leh a pa inpawlna tel lova inthlah pung thei miah lo ransate hi eng tin nge ransa mawl ber amoeba atanga an lo insiam theih le? Sex awm hmâ hian engtin nge an lo pun ngawt theih tih hi zawhna pawimawh tak a ni.
Mihring
A tâwp berah Pathian chuan Ama anpui mihring a siam ta a. Mihring hi vaivut hmanga a siam a ni a. A siamna hmanrua lei chanchin hi ka hre tam lo khawp mai. Mihring taksa za zela 70 hi tui a ni e kan ti a. Mihring taksaa heti zât tui awm sawi ri miah lova a tlêm zâwk (tui ni lo zawng) sawi rik a ni hi a mak hle bawk.
Tichuan mihring hmasa ber Adama chu Zirtawpni chuan a rawn piang ve hlawl mai a. A bul vela ransa mak pui pui, a inkawp zela lo awm fer fur te, pangpâr mawi tak tak leh phaizawl mâwi tak tak te, sava chi tin reng hrâm nuaih nuaihte chu mak a ti viau ang a, zawhna pawh a ngah ngawt ang. Eng vangin nge engkim hre lâwk vektu Pathian chuan Adama kawppui tur hmeichhia hi a siam ve nghal mai loh? Adama chuan ransa mak pui pui leh sava thlawk nuaih nuaihte chu a han thlir a, a rilru a kim thei lo. A khua a har ru ta ngawih ngawih mai a nih chu. Mihring hian hmangaihtu kan mamawh ang bawkin hmangaih tur kan mamawh; kan mamawh dan a inang reng. Pawisa te, rangkachak te, lunghlû te hi kan ngaihlûin kan dah sâng hle a, mahse hengte pawh hi min hlut puitu leh min tawmpuitu an awm loh chuan engtihna mah an ni lo.